An elaborat en Occitània un tèst de diagnostic rapid del virus Ebòla, realizable en mens de 15 minutas, segon çò que rapòrta l’AFP. Lo tèst es estat elaborat per una còla del Comissariat de l’Energia Atomica (CEA) a Marcola (Garrigas) e “serà utilizable sul terren, sens material especific, a partir d’una gota de sang, de plasma o d’urina”.
 
Nomenat eZyscreen, un prototipe del tèst serà disponible a la fin d’octòbre per permetre la validacion clinica sul terren.
 
Los tèstes actuals de diagnostic del virus Ebòla prenon mai de doas oras de mejana e devon èsser practicats exclusivament en laboratòri.
 
De tèstes mai rapids son en cors de desvolopament dins divèrses païses. De cercaires japoneses avián anonciat lo mes passat qu’avián trobat un nòu metòde per detectar lo virus en 30 minutas. Als Estats Units son a trabalhar sus un tèst que poiriá diagnosticar lo virus en 10 minutas.
 
 
L’Ebòla se pòt garir
 
L’infirmièra espanhòla tocada per la malautiá es estada garida. Es pas la primièra persona que se salva. Ara cal testar lèu suls malauts los metòdes emplegats dins aquelas primièras garisons: d’un costat en Japon an desvolopat un antiviral que poiriá plan marchar, de l’autre i a la seroterapia, que se tracta d’administrar al pacient de serum d’autres malauts que ja son garits, e qu’auriá plan marchat amb l’infirmièra espanhòla.
 
 
De mètges occitans en Guinèa avaloraràn l’antiviral japonés
 
Una còla de mètges del país va menar de tèstes inedits en Guinèa. La còla de l’INSERM del Doctor Denis Malvy, especialista de las malautiás tropicalas a l’espital de Bordèu, avalorarà l’antiviral japonés sus de malauts, segon çò que rapòrta Le Figaro.
 
Se marchava seriá una reüssida, bòrd qu’aquel medicament s’emplega ja en Japon contra la gripa sevèra e a fach la pròva de son innocuitat. S’administra per via orala e a l’ora d’ara es disponible en grandas quantitats industrialas.