Dal 31 d’octòbre al 2 de novembre se debanarà la 24a Fèsta dal Dalfin, nomenaa Uvernada, al Borg Sant Dalmatz (Val d’Estura) amb Lo Dalfin, Massilia Sound System, La Talvera, Nux Vomica e fòrça autres artistas.

E son vint e quatre. Quora, ental luenh 1991, a la pichòta Societat Agricòla dal Borgat se tenia la premiera Fèsta dal Dalfin, degun, mas pròpi degun, auria porgut imaginar qu’aquel festin, organizat per lo grop per rengraciar un pichòt estrop de sosteneires que l’avia seguit aquela istaa, seria devengut la pus importanta manifestacion musicala (e pas mec) des Valadas Occitanas d’Itàlia. Despuei aquela mitica nuech, de navisar sustot per la quantitat omerica d’alcòl consumat per sonaires e public, un “efiech chalancha” a vist chasca edicion créisser e testimoniar l’evolucion d’un interès vèrs Lo Dalfin e la musica occitana que, de question iperlocala o eleitària, es devengua un fenomèn de costuma enraïsaa amb una foncion d’agregacion e identificacion collectiva qu’a ben sobrat las limitacions d’una mòda passatgiera. La musica d’òc es l’element pus original e fòrt d’identitat des Valadas.
 
Lo Dalfin es estat lo tronaire d’aqueste fenomèn, lo motor de sa perpetuacion, la tèsta que l’a fach sempre renovelar, e sa fèsta, aüra devengua Uvernada en onor d’una dimension que sobra l’aigavèrs des Alps, l’annuala celebracion de la vitalitat e de la creativitat occitana. Tot aquò per lo public, qu’a totas las edicions es arribat des Valadas, mas decò de fòra e, ben interessant, sempre pus nombrós de las autras regions occitanas. Gascons, lengadocians, auvernhats, provençals, lemosins e niçards son venguts a la fèsta coma en un romeatge vers La Mèca de la musica occitana. Ladins, valdostans, sardes, catalans, bretons e monde d’autras minoranças venon a la manifestacion coma a un rescontre entre las diferentas realitats etnicas fòra logicas folcloristicas o malautosas e paraculturalas, mas pustòst coma a una fèsta 2.0 de la vuelha d’apertenença e de l’orguelh territorial per lo public e per lhi artistas: de Massilia Sound System a la Talvera e Nux Vomica (protagonistas d’aquesta edicion), Lo Seriòl [Lou Seriol], Castanha e Vinovèl, Tèsta Pelada, Coriandre, Sèm de Caors, L’Art à Tatouille, Alain Floutard, Tapia eta Leturia e ben d’autres, tota la musica occitana e a l’environ es passaa sal palc de la Fèsta dal Dalfin ent aquesti ans. Per lhi artisans es ja un rendètz-vos ritual, per lhi apassionats e lhi curiós per emburjar lhi banquets di laütiers (sustot las legendas Boudet e Castagnari) per chantar, s’informar o mec per arrambar-se a la nòbla art de la construccion d’instruments musicals tradicionals.
 
Mas lhi a d’alre: l’Uvernada 2014 a una programacion de pus d’un mes e mieg; es començaa lo 13 de setembre amb la Nuech de la Correnta al Vernant e chasca fin de setmana prepausa d’iniciativas gastronomicas-musicalas qu’an per protagonistas las Vals Vermenanha, Estura, Grana, Maira, Pò e las Valadas Vaudesas, gràcias al mèdia partenari Radio Beckwith Evangelica.
 
La manifestacion es per sa natura transfrontaliera e ental 2014 lo cria fòrt. Ent un moment istoric que vòl realizar una faraonica òbra ferroviària en la valada occitana d’Ors, lo Còl de Tenda, un di còls internacionals pus frequentats dal nòrd-oèst, es sovent sarrat, e lhi trens per Niça son estats talhats drasticament. Pr’aquò s’es decidit d’aderir al comitat per la defensa de la linha Coni-Niça e lo 18 d’octobre un important e simbolic rendètz-vos testimoniarè l’importància d’aquesta batalha: Sergio Berardo tenarè un concèrt acostic improvisat sal tren en viatge per la ciutat de Garibaldi ente, a l’estacion de Sant Ròc, lhi Nux Vomica atendarèn la delegacion des Valadas.
 
L’Uvernada es una manifestacion que viu esquasi mec amb sas fòrças e la programacion d’aqueste an es economicament aturaira, pr’aquò se son cerchaas d’autras formas de finançament. Una d’aquestas es la Loteria de la Laüteria amb d’importants prèmis coma una viòla Pajot dal 1881, ufèrta per Jean-Claude Boudet, e un semiton Castagnari. Las bilhetas, que son de 2 èuros, serèn venduas fins al moment de l’extraccion, l’aprèsmerenda de diamenja 2 de novembre.
 
Mas venem al detalh d’aquesta edicion: dubertura a 19 oras dal venres 31 d’octobre; a 21 oras amb lor ragga occitanobrasilier arribarèn lhi Nux Vomica, pòrtabandieras de la tradicion niçarda, animators dal Carlevar independent de Sant Ròc, una institucion ental capluòc des Alps Maritimas. A seguir lhi protagonistas principals de la seraa, Massilia Sound System, qu’an esquasi pas manca d’èsser presentats. Amb public e vendas extraordinaris en tèrra francesa, chantan Marselha, la fèsta, las amors mas decò las ipocrisias e las luchas de la ciutat. En francés e en occitan, lo grop fai dal bilinguïsme sa fòrça. La millenària lenga d’òc es pas adobraa coma una clausura regionalista mas coma un ver espaci de libertat, un instrument de creacion amb de possibilitats infinias, coma la musica reggae. Al Borg sonarèn lhi tòcs dal novèl CD en la soleta data italiana de lor tornaa.
 
Après lo concèrt d’MSS la serada continuarè amb las seleccions musicalas de Paolone Aka Ferrari, membre de la Torino Posse, DJ a Radio Due, Radio Flash e Radio Torino Popolare, jornalista per La Stampa, Rumore e Il Manifesto e biograf oficial dal Dalfin.
 
Ental jorn de la comerciala e americana fèsta d’Halloween una serada reggae occitana ent aquela que poleria devenir una Nuech des Maschas.
 
Decò, sande 1 de novembre, la musica començarè a 21 oras amb la Dario & Manuel Big Band, preséncia que pòl pas mancar a la Fèsta dal Dalfin amb lors ardentas correntas e balets. Après lhi paladins de la Val Vermenanha serè lo bòt de La Talvera: naissut al principi de lhi ans 80, lo grop continua a explorar la tradicion occitana creant un repertòri musical e poetic enraïsat en la contemporaneïtat. Encuei La Talvera es segurament una banda de musica occitana mas se pòl pas classificar; ni ragga, ni world, ni mec tradicionala. Es l’embroa d’un gruis ente las èrbas salvatjas se mesclan; es ent aqueste espaci de libertat que naisson las chançons de Daniel Loddo.
 
E finalament serè lo bòt di festejats Lo Dalfin, al darrier rendètz-vos de la sason après la fortunaa tornaa que lhi a portats de Calàbria a Gasconha. Sergio e sa banda son en chamin a trabalhar ai tòcs dal novèl CD que, amb la biografia dal grop, fai part de lhi ambiciós projèctes per lo 2015, e coma sempre a l’Uvernada tenarèn un concèrt especial, amb d’autres sonaires e surpresas.
 
La nuech de la dança finissarè amb l’espectacle des Occitanas, grop format mec de fremas coordenaas per Simonetta Baudino.
 
A animar lhi temps mòrts al chambi dal palc serè la Fanfara Transalpina dirècta de Dino Tron.
 
La musica serè protagonista decò diamenja 2 de novembre: a 15 oras serè lo bòt dal Sindicat Autonòm de la Correnta, ambiciós projècte de Fabrizio Carletto que vòl reünir tuchi lhi sonadors de correnta e balet de la Val Vermenanha. Lo concert serè decò registrat e devenarè un CD live. Amb lhi sonadors tradicionals de la valada sonarèn tuchi lhi membres dal Dalfin.
 
Mas l’Uvernada es pas mec musica; la Mòstra dal Merchat de Laüteria e Artisanat, amb lhi mielhs laütiers, nombrosas excelléncias dal territòri e de banquets dedicats a las associacions occitanas, serè dubèrta venres 31 d’octobre a partir de 19 oras, sande 1r de novembre a partir de 14 oras 30 e diamenja 2 de novembre a partir de 10 oras.
 
A 16 oras 30 de sande 1r de novembre se passarè l’estagi de danças (dedicat al congò e danças de Gasconha), tengut per la reina dal bal occitan Daniela Mandrile e serè mai assignaa la Targa Mèstre, reconoissença per una personalitat que s’es engatjaa per lo desvolopament e la difusion de la cultura occitana, aqueste an destinaa pas a una persona fisica mas a Radio Beckwith Evangelica.
 
Per tota la Fèsta e per lo Grand Dinnar Occitan de diamenja 2 de novembre serè dubèrt lo Restaurant Uvernada: la cusina, sempre recerchant l’excelléncia, serè curaa per lo Portichetto de Caralh amb lo sieu chap Poldo. Es aqueste lo menut: veèl de la nòna amb banhet a l’antica, calhetas al Chastelmanh, brasat al vin ros amb trifolas al forn, torta de prus madernassa de la Val Grana. Per lo public serè possible d’intrar dirèctament dal cant dal restaurant sensa passar per lo salon di concèrts.
 
Per qui arriba de fòra son estaas estrechas de convenientas convencions amb lhi aubèrges dal pòst, la lista es presenta sal sit Uvernada.eu.
 
La darriera nòva dal 2014 es multimediala: tuchi lhi concèrts de la Fèsta dal Dalfin serèn visibles en dirècte, en streaming sal web, gràcias a la collaboracion amb la Dr.Net de Diego Rainero.
 
 
 
 
Lo Dalfin [Lou Dalfin]
 
 
 
_____
Mai d’informacions
— Telefòn: +39 011 55 33 624 / +39 329 00 97 484
— Web: www.uvernada.eu — www.loudalfin.it
— Facebook: www.facebook.com/uvernada – www.facebook.com/loudalfin
— Mail: info@lou...
 
 
 

fffff		fffff
	Programa:   Venres 31 d’octobre   — Nux Vomica — Massilia Sound System — DJ Paolone Aka Ferrari     Sande 1r de novembre   — Dario & Manuel Big Band — Fanfara Transalpina — La Talvera — Lo Dalfin [Lou Dalfin] — Occitanas     Diamenja 2 de novembre   — Grand Dinnar Occitan e puei bal amb lo Sindicat Autonòm de la Correnta     e encar...   — Mòstra dal Merchat de Laüteria e Artisanat. — Estagi de congò e danças de Gasconha amb Daniela Mandrile — Restaurant Uvernada curat per Il Portichetto de Caralh, dubèrt per tot lo festenal