Quatre joves de la vila de Lunèl, a las confinhas de Lengadòc e Provença, moriguèron la dimenjada passada en Siria, près de la frontièra de Liban, per un bombardament de l’armada siriana, en tot luchar per l’Estat Islamic. Raportèt la nòva Midi Libre, après que las familhas dels mòrts recebèsson un còp de telefòn. Tres dels joves jihadistas occitans mòrts venián d’una familha d’origina musulmana, dos èran fraires, e lo quatren s’èra convertit. Sabon pas se poiràn recuperar los còrses per los enterrar.
 
Segon Le Figaro, a Lunèl cor la rumor que d’autres joves de la vila serián en partença per luchar amb los islamistas.
 
La Direccion Generala de la Seguretat Interiora (DGSI) trabalha activament per eradicar aqueste fogal de jihadistas dins l’estat francés. Los servicis d’informacion franceses an ja recensat aperaquí 1000 ciutadans que se’n son anats ajudar l’Estat Islamic, dont 350 se serián engatjats coma combatents. D’aqueles, 118 son tornats dins l’estat francés, dont 114 son estats detenguts, 78 meses en examen e 53 empresonats.
 
Pasmens las politicas d’assimilacion e negacion de las culturas autoctònas e immigradas son pas encara mesas en question dins l’Occitània administrada per l’estat francés.