Actualitats
Un mòrt a la manifestacion contra la restanca de Sivens
L'estat anóncia la suspension dels trabalhs
Dissabte 25 d’octòbre de 2014, de milierats d’opausants s’amassèron contra lo projècte d’una restanca dins la zòna umida del Testet, al Bòsc de Sivens (Galhaqués). Aquela mobilizacion aviá per objectiu de faire ausir los arguments dels opausants a l’irrigacion industriala abans la publicacion del rapòrt d’expèrts a la ministra de l’environament Ségolène Royal.
Entre 5000 e 10 000 personas manifestèron pacificament dins la val que foguèt parcialament arrasada per las òbras de la restanca.
Aprèp la destruccion per lo fuòc de la cabana vuèja de las òbras, l’arribada massissa de las fòrças de l’òrdre foguèt seguida d’afrontaments amb certans individús.
Ne resultèt la mòrt d’un òme de 21 ans, Rémi Fraysse.
Diluns 27 d’octòbre de 2014, lo rapòrt serà publicat e benlèu las òbras seràn suspendudas.
Jean-Charles Valadier
| fffff | fffff | |
| Sosten popular e cauma de la fam Dempuèi lo 1r de setembre, que comencèron los trabalhs de desboscament, las protèstas se son multiplicadas sus plaça e per tot lo país. Los activistas Christian Conrad, Roland Fourcard e Gilles Olivet son en cauma de la fam per demandar la dobertura d’un debat public sul projècte de restanca. Libertat e d’autres movements politics e socials d’Occitània an mostrat activament lor sosten, e tanben la societat civila de Galhaqués, mai que mai dels estudiants e dels elevaires. Del costat dels elegits, an recebut lo sosten de l’èx-ministra Cécile Duflot, dels deputats ecologistas Noël Mamère e José Bové e del dirigent del Partit d’Esquèrra Jean-Luc Mélenchon. Aqueles darrièrs elegits an participat activament al recampament sus plaça aquesta dimenjada. Aquesta setmana se farà public un rapòrt d’expèrts comanditat per la ministra francesa de l’ecologia, Ségolène Royal, que poiriá metre en question lo projècte. Lo projècte La restanca prevista, d’un milion e mièg de mètres cubes d’aiga, negarà una partida de la Val de Tescon, en tot far desaparéisser 13 ectaras de zòna umida e en fasent desaparéisser un milion d’animals salvatges (de granhòtas, de peisses o de salamandras). Lo conselh general de Tarn cita lo Ministèri francés de l’Environament, segon lo qual la restanca auriá de vertuts ecologicas, cercant un “equilibri idrologic” de la zòna, çò que los ecologistas creson pas. S’opausan al projècte e denóncian qu’es finançat per de fonzes publics per favorir solament d’interèsses privats. Revendican la preservacion de totas las 35 ectaras de zòna umida menaçadas per la restanca. Denóncian que la tòca del projècte es de favorizar l’agricultura intensiva e que, per tant, es un perilh per un centenat d’espècias “protegidas” dont cinc son ja declaradas menaçadas. Cridan d’individús, de comitats, de collectius e d’autras fòrças de resisténcia a organizar d’accions descentralizadas al ras de las entrepresas e las institucions engatjadas dins lo projècte de restanca: CACG, Ador-Garona, conselhs generals de Tarn e de Tarn e Garona e tanben las prefecturas, lo Ministèri de l’Ecologia, las comunautats europèas, etc. Lo collectiu ensajan de tornar abitar la zòna per empedir la construccion de la restanca. Declaran que lor “resisténcia es dinamica e creativa” e que luchan “contra un sistèma de las idèas e de las practicas, mas dins cap de cas contra d’individús”. Segon lo Conselh General de Tarn, la restanca es indispensabla per irrigar las tèrras agricòlas e se recrearà una autra zòna umida. Los opausants denóncian un projècte car que solament servirà a irrigar las tèrras d’un petit nombre d’esplechaires que practican l’agricultura intensiva. | ||
— Ouest France: Barrage de Sivens (Tarn). Un rapport d'experts très critique
— Reporterre: Drame au Testet : un mort. Premier récit
— Lista d'omenatges a Remy Fraisse
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Remi Fraisse - Sosten a la ZAD del Testet : Carcassona, dimecre 29/10 a 18h davant la prefectura. Pòble d'òc, bolega-te !
Ni doblit, ni perdon !
Nòstre comunicat en omenatge a Remièg Fraisse: http://iniciativaoc.blogspot.fr/2014/10/omenatge-remieg-fraisse-defensa-del.html
Un reportatge interessant per conéisher drin mei los activistas de Sivens : https://news.vice.com/fr/video/la-bataille-pour-la-fort-de-sivens
Vice.com qu'a tanben parlat de la mort d'aqueth òmi dab hèra de detalhs https://news.vice.com/fr/article/body-found-near-disputed-dam-site-in-france39s-sivens-forest-fr-translation
Deu men punt de vista, aqueth activistas que son çò qui son : Non, ne semblan pas locaus, quiò, que semblan marginaus, drin marros, pas tots plan finòts... Mes los locaus plan vestits e plan penhats, que sian occitanistas o pas, ne hèn pas autant com eths per empachar los agrò-industriaus de destrusir aqueth parçan.
Per jo que meritan respècte per çò qui hèn e compassion si l'un d'eths ei estat tuat.
Remi Fraisse es mòrt, los gendarmas e lo poder socialista francés l'an tuat. Ont es la granda majoritat dels occitanistas per devesar la ZAD del Testet sus lo país nòstre ?!!! N'i a pro de tots aquels cuturals e "intellòs" de salon, la lutta es sus aquela tèrra per la terra nòstra, al costat de la joventut revoltada. Occitanistas, bolegatz-vos, ni oblit, ni perdon per Remi Fraisse, la ZAD del Testet viurà !!!
#13 Exactament coma 'chafre' dins tota la lenga occitana.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari