Google a aviat dimècres passat lo sieu projècte Lengas en Perilh, que cèrca d’ajudar a la preservation de las lengas en via de desaparicion.

Google vòl metre “la siá tecnologia al servici dels organismes e de las personas que luchan contra la desaparicion de las lengas en las documentant, en las protegissent e en las ensenhant”.
 
Aital, sul sit web endangeredlanguages.com, se pòt consultar, a partir d’una mapa del mond, de fichas sus aperaquí 3000 lengas menaçadas. Los ponches sus la carta son de diferentas colors per indicar lo gra de vulnerabilitat de cada lenga. Lo verd vòl dire qu’una lenga es vulnerabla, lo jaune, qu’es en perilh, e lo roge, que se tròba en grand perilh. Es lo cas de l’occitan, segon Google.
 
En quichar sus una lenga, se’n tròba divèrsas informacions. Los contenguts son collaboratius, valent a dire que se convida los internautas e las comunitats lingüisticas a partejar de tèxtes, de vidèos e d’autres elements per ajudar a preservar las lengas menaçadas. “Las tecnologias pòdon sosténer aqueles esfòrces, en ajudant las gents a crear d’enregistraments de nauta qualitat dels lors ainats, sovent los darrièrs locutors de la majoritat d’aquelas lengas, en metent en contacte las comunitats desparièras dins los mèdias socials e en facilitant l’aprendissatge de lengas", çò ditz Google.
 
Qualques fichas an pas gaire d’informacions, es lo cas de l’occitan que, ara per ara, sonque a la traduccion de la Declaracion Universala dels Dreches Umans e pro. Ven a nosautres d’i apondre quicòm.