Lo secretari general de Sortu, Arnaldo Otegi, en preson dempuèi cinc ans, considèra qu’“ara es ora” de prepausar que lo procès d’independéncia del Bascoat se faga “sens cap d’acòrdi amb l’estat”. Otegi faguèt aquela reflexion dins una longa entrevista de cinc paginas que publiquèt dimenge lo jornal basco Berria.
 
Dins l’entrevista Otegi ditz que lo Bascoat es luènh de la situacion de Catalonha e Escòcia, per tant, es imprescindible d’aviar un debat sus cossí deu èsser lo sobeiranisme basco del sègle XXI. El afirma que cal quitar l’esquèma classic defendut per l’esquèrra basquista: “es arribat lo moment de pensar que lo procès de liberacion lo deurem far sens cap d’acòrdi amb l’estat espanhòl”, pr’amor que, segon el, l’estat fa sonque pèrdre de temps.
 
Tanben fa d’autocritica e sosten que las tres zònas que marcan la politica del Bascoat (comunautat autonòma basca, comunautat autonòma de Navarra e Bascoat Nòrd de l’estat francés), las cal respectar, per fin que se pòsca iniciar un procès independentista dins una d’elas, desligada de las doas autras. Aquò es un cambiament en la linha istorica de l’esquèrra independentista basca, e mai se la tòca finala es d’“aténher un estat sobeiran suls sèt territòris bascos” (Alaba, Biscaia, Guipuscoa, Navarra, Labord, la Bassa Navarra e Sola).
 
Per far l’entrevista, lo jornalista mandèt un questionari a Otegi que respondèt dins la preson.
 
Otegi foguèt condemnat a sièis ans e mièg de preson per apertenéncia a una banda terrorista dins l’encastre del dich “afar Bateragune”, ont lo jutgèron, el e d’autres politicians, en l’acusant de refondar Batasuna —un partit politic basquista d’esquèrra qu’èra estat illegalizat—, e mai en l’acusant de se reünir amb ÈTA dins una temptativa ont la banda armada declarèt una trèva, per fin que de basquistas poguèsson participar a las eleccions municipalas e autonomicas bascas de 2011.