Lo vicepresident dels afars europèus, las relacions internacionalas, la cooperacion descentralizada e la reflexion sul futur de las regions de Miègjorn-Pirenèus, Gérard Onesta, afirmèt diluns passat que son govèrn regional seriá observaire internacional del procès participatiu de Catalonha, lo vòte per l’independéncia de Catalonha qu’a convocat lo govèrn autonomic del nòstre país fraire pel 9 de novembre que ven.
 
Onesta o manifestèt dins una conferéncia de premsa a Palma (Malhòrca) après l’assemblada de l’Euroregion Pirenèus-Mediterranèa.
 
L’elegit occitan indiquèt que lo govèrn de Miègjorn-Pirenèus seriá observaire del procès del 9 de novembre, après acceptar l’invitacion del conselhièr catalan de la presidéncia, Francesc Homs. Dins aquel sens Onesta afirmèt que lo procès catalan seriá observat de plan près del costat francés; e apondèt: “podèm aprene fòrça los unes dels autres”.