La session de ièr del Parlament de Catalonha foguèt alterada per la preséncia de quatre individús qu’èran a la tribuna dels convidats. Eles se consagrèron a aplaudir amb fòrça vam las intervencions dels deputats del Partit Popular e de Ciutadans quand criticavan lo vòte del 9 de novembre que ven. La presidenta de la cambra, Núria De Gispert, lor atirèt l’atencion e lor demandèt silenci, mas en remarcar qu’observavan pas aquela demanda, De Gispert lor demandèt de quitar la sala. En aquel moment cridèron “Viva España” del temps qu’un d’eles auçava lo braç en fasent la saludacion faissista.
 
Lo 9 de novembre que ven, los ciutadans de Catalonha e d’Aran son cridats a un procès participatiu per donar lor vejaire sus l’independéncia del país. Deu èsser un referendum non constrenhent mas l’estat espanhòl a demandat al Tribunal Constitucional de lo suspendre. L’estat cèrca tanben ara lo biais d’empedir aquel procès participatiu.