Aprene de nòvas lengas pòt causar lo meteis plaser qu’amb lo chocolat, lo sèxe o los jòcs d’azard, segon las conclusions d’un estudi fach per de cercaires de l’Universitat de Barcelona (UB), de l’Institut d’Investigacions Biomedicalas de Bellvitge (IDIBELL) e de l’Universitat Otto von Guericke de Magdeborg (Alemanha). Dins un estudi publicat dins la revista Current Biology, los scientifics explican cossí an determinat que conéisser lo sens dels mots activa tanben los circuits cerebrals de motivacion e de recompensa.
 
“La tòca del trabalh èra de veire fins a quin ponch aprene una lenga poiriá activar aqueles circuits del plaser e de la recompensa. D’un autre costat, que lo lengatge se siá sostengut per aqueles circuits es una ipotèsi interessanta d’un ponch de vista evolutiu”, çò ditz Pablo Ripollés, un dels autors de l’estudi.
 
Per conclure tot aquò, los scientifics faguèron dos imatges de resonança magnetica a 36 adultes, que mostravan que l’aprendissatge d’una nòva lenga activa las meteissas partidas del cervèl que per los jòcs d’azard.
 
Los cercaires afirman qu’aquela descobèrta poiriá ajudar a trobar las claus pel desvolopament de las lengas umanas, e de motivacions per aprene d’autras lengas.