Lo conselh general del departament de Tarn anoncièt ièr que suspendiá la construccion de la restanca de Sivens (Galhaqués) mas qu’abandonava pas lo projècte. Ièr i aguèt pas de debats mas solament una unica declaracion. Lo departament occitan demanda a l’estat francés de prene la decision de quitar o quitar pas aquel projècte polemic, qu’a costat quitament la vida d’un opausant, mòrt après una repression policièra desmesurada. “Servís pas a res que prengam de decisions s’après sèm supervisats per la ministra de l’ecologia. Sèm realistas. Aqueste debat qu’èra local ven un debat nacional, daissem çò nacional prene una decision”.  Lo tèrme “nacional” lo cal comprene coma “estatal”.
 
 
De problèmas pel govèrn francés
 
De fach, la mòrt de Rémi Fraisse a portat la crisi al govèrn francés. Las nombrosas susmautas que se son ocasionadas per tot l’estat francés en seguida de la mòrt de l’estudiant de botanica an portat de problèmas al govèrn de la Republica.
 
Lo govèrn francés a ensajat de reglar la mòrt del jove tolosan en enebissent l’usatge de las granadas e en suspendent los trabalhs del barratge, mas un larg sector de la societat, los movements ecologistas e los partits d’esquèrra demandan la demission del ministre de l’interior, Bernard Cazeneuve, que s’es limitat a dire que i aurà “de sancions se se son comesas de fautas”. Mentretant, las protèstas e las susmautas se multiplican.
 
Una carta per plaçar la contestacion
 
Le Monde a publicat una infografia interactiva que mòstra una mapa detalhada de la zòna dels trabalhs e de la protèsta.
 
La construccion d’una restanca dins la zòna umida del Testet, al bòsc de Sivens, que serviriá segon lo conselh general de Tarn per irrigar las tèrras agricòlas. Los opausants denóncian un projècte car que solament servirà a irrigar las tèrras d’un petit nombre d’esplechaires que practican l’agricultura intensiva.