“Si tracta d’un escandal d’estat” çò declarèt a BFM-TV lo cònsol de Niça, Christian Estrosi. Aquela declaracion seguissiá un comunicat que publiquèt diluns passat, ont Estrosi se disiá “estonat d’emparar l’existéncia d’una nòta de la DGSI indicant qu’un òme, tot just desbarcat de Siria, avia idèa de faire un atemptat a l’explosiu au temps dau darrier Carnaval”. Lo cònsol se demanda “coma es possible qu’un tal eveniment si produga a Niça, sensa que l’ensemble dei mejans utils a la seguretat publica, especialament la polícia municipala e li aisinas de videoproteccion, ne sigan mobilizats per protegir lu niçards e lu nòstres vesitaires?”. Aquò o raportava ièr Nice Matin.
 
De fach, en febrièr de 2014, se seriá empachat un atemptat amb explosiu al Carnaval de Niça, segon una informacion d’RTL, que cita una nòta de la Direccion Generala de la Seguretat Interiora de l’estat francés (DGSI). Segon aquela informacion, aurián arrestat un òme “tot just desbarcat de Siria”.
 
Christian Estrosi ditz que va sasir la justícia contra lo prefècte del departament dels Aups Maritims, Adolphe Colrat. “Aquela fauta d’informacion a fach córrer un risc e causa un prejudici a la vila. Finda, sus la basa d’aqueli disposicions juridiqui, engatjarai au tribunau administratiu d’accions còntra la prefectura dei Aups Maritims qu’a desconegut volontàriament la lei e ensin faguèt pear un risc sus li niçardas e lu niçards”, çò assegura.
 
Es pas lo primièr còp que lo cònsol de Niça s’afronta al prefècte. Estrosi a demandat lo cap del prefècte Colrat almens en tres ocasions: a prepaus dels ritmes escolars a Niça, dels incidents del match de fotbòl Niça-Bastia e dels tempèris de genièr. Es pas tanpauc lo primièr còp que parla d’“escandal d’estat”: o diguèt ja quand foguèt pas convidat a una reünion a la prefectura del departament a prepaus de l’arribada de refugiats d’Eritrèa en batèl.