L’Institut de Sciéncias Politicas d’Ais de Provença es dins una crisi grèva, segon çò que publica Le Figaro. Los estudiants denóncian la banalizacion del diplòma e demandan la demission del director Christian Duval, per externalizar a l’estrange una especialitat de mastèr via de partenariats amb d’escòlas privadas.
 
Aquela crisi poiriá èsser mai grèva perque sièis autres Instituts d’Estudis Politics (IEP) de l’estat francés avián previst d’exclure lo centre sextian de la procedura de concors comun. Fin finala Sciéncias Politicas d’Ais a un an de sosta.
 
Los sèt directors dels IEP an avertit que la gestion en externalizacion de Duval “pòrta prejudici a la marca e l’imatge de las Sciéncias Politicas”. An tanben indicat qu’una enquèsta es menada a l’ora d’ara pel comitat d’audit de l’Universitat d’Ais-Marselha e una expertisa juridica per la Direccion Generala de l’Ensenhament Superior e de l’Insercion Professionala, sus la gestion de Sciéncias Politicas d’Ais. Duval, a Ais, s’es engatjat a “tirar totei lei consequéncias” de las conclusions.