Era mei qu'una partida de fotbòl ger ser. Alemanha – Grècia ei una confrontacion qu'a forçadament tanben un resson politic, en aquèth contèxte de crisi europèa.

Après tres victòrias en tres partidas, Alemanha èra grana favorida d'aqueth encontre. La Mannschaft a multiplicat las ocasions en debut de partida e a calut un gran portaire grec per esvitar d'estar tròp viste menat a l'escòre, Sifakis qui malurosament ei pas demorat tant bon tot au long de la partida. Simbèu de l'esperit ofensiu d'aquera equipa alemanda, ei lo defensor laterau Lahm qui a marcat lo prumèra gol un pauc abans la pausa.

En tornar deu vestiari, esperavan un navèth gol aleman mes sus un contra plan menat, lo gran Samaras a egalizat per Grècia. Un espèr que s'ei viste esvanit après lo gol de Khedira dab una bona represa de volada, seguit per Klose e Reus, abituaus remplaçants mes titularis ger ser. Salpingidis redusirà l'escòre per Grècia sus penalti en las darrèras minutas de jòc.

Una victòria pro aisida, 4 a 2 per Alemanha, qui segueish son camin. La Mannschaft afrontarà lo ganhant d'Anglatèrra – Itàlia que se debana dimenge.


Grècia se'n va lo cap lhevat

Ei pas mespresent de diser que l'efectiu de l'equipa greca èra pas lo mei talentuós d'aqueth Euro 2012. En ataca notadament, mes tanben en defensa centrala, Grècia avè pas las armas que calè per impausar son jòc aus adversaris. Mes avèva una auta qualitat : l'esperit d'equipa e la motivacion collectiva.

Maugrat un prumèr encontre desfavorable, notadament en per'mor de l'arbitratge, los grecs an pas deishat e an creat la susprèsa en bàter la bona seleccion de Russia. Sorteishan de l'euro per la grana pòrta, dab lo sentiment d'aver hèit aunor a un pòble que li a pas hèit mau de se divertir un pauc.




Matieu Casanòva