Los presidents d’Alemanha, França, Itàlia e Espanha s’acòrdan sus un plan de 130 000 milions d’èuros per la creissença economica. Espanha demandarà deman los sòus pel salvament.
Los dirigents de França, Espanha, Itàlia e Alemanha s’amassèron divendres a Roma per far un acòrdi sus las mesuras destinadas a la creissença, çò que demandava François Hollande, qu’es opausat a aplicar solament de reduccions budgetàrias. Lo primièr ministre italian, Mario Monti, anoncièt que l’UE destinarà 1% del PIB de la zòna, aperaquí 130 000 milions d’èuros, a un plan de mesuras d’estimulacion per la creissença.
Hollande aviá prepausat de finançar aquel plan amb de fonzes estructurals de l’Union Europèa, de la Banca Europèa d’Investiments e d’obligacions comunas emesas pels estats membres. Lo president francés demandèt a l’UE d’emplegar los mecanismes per donar fisança als mercats e luchar contra l’especulacion.
Lo president espanhòl, Mariano Rajoy, avalorèt positivament la reünion e mencionèt los cinc acòrdis dels quatre estats europèus: contrarotlar lo deficit public estatal e non agrandir lo deute public; far de reformas estructuralas al nivèl estatal e europèu; aténher l’estabilitat dels mercats, e escometre amassa per una Euròpa mai unida al nivèl politic, bancari e fiscal.
La cancelièra alemanda, Angela Merkel, qu’es per las reduccions budgetàrias, disiá divendres que caliá tractar energicament la creissença e l’emplec e diguèt qu’investir 1% del PIB en creissença es çò qu’Euròpa n’a de besonh a l’ora d’ara.
Los quatre dirigents portaràn lo plan d’ajuda a l’amassada europèa de la setmana que ven, ont tanben s’i debatrà la taxa sus las transaccions financièras, coneguda coma taxa Tobin.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#1 Non i a cap de traductor automatic. Simplament, ena Occitània de dehòra der Estat francés non sabem cap comptar en miliards. Per çò que dides, supòsi que 1 miliard son, donques, mil milions. "Pourquoi faire simple quand on peut faire compliqué", tè!
Ua hèra bona novèla, mes quina contrapartida e s'a balhat ar'Alemanha ? M'estonaré que n'avosse pas obtiengut arren, n'ei pas l'anar de Merkel !
Audement, 130 000 milions d'€ que son tot simplement 130 miliards, mercés aths amics deth Jornalet de ns'invitar a har drin de calcul mentau, mes per aquò, era sola faiçon de díser qu'ei "130 miliards". Eth corrector automatic que'us a dengüèras jogat un torn :-)
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari