Los 43 estudiants desapareguts en setembre passat a Iguala, dins l’estat de Guerrero, en Mexic, foguèron assassinats, segon çò qu’a confirmat lo ministèri public d’aquel país. Tres sicaris d’un cartèl de la dròga nomenat Guerreros Unidos an confessat lo crime. Segon aquela confession, la polícia municipala d’Iguala liurèt los estudiants als narcotrafegants, que menèron los joves manifestants fins a un bordilhièr de la vila de Cocula. Qualques estudiants moriguèron asfixiats dins lo viatge del temps que los autres foguèron tuats, après los bandits cremèron lors còrses e lancèron lors cendres al riu dins de sacas.

An recuperat doas sacas del riu e se farà l’identificacion de l’ADN en Àustria. Pasmens, qualques parents de las victimas demandan mai de pròvas e pensan que qualques estudiants poirián èsser vius encara.

Fins ara i a 74 detenguts, dont lo cònsol d’Iguala e sa femna, de membres de la polícia e de narcotrafegants.

L’afar a generat una avalanca de protèstas en Mexic e a mes de relèu la complicitat dels elegits e de la polícia amb los cartèls de la dròga.