Lo resultat es net e clar: un 80% dels catalans an votat per que Catalonha venga un estat independent; un 10% an causit l’opcion federalista, que Catalonha venga un estat mas pas independent; e un 4,5% an votat contra l’independéncia e per demorar parièr dins Espanha. La participacion al vòte es d'aperaquí lo 42% dels elegeires,  e mai s’èra illegalizat per l’estat espanhòl, e mai se se fasiá jos la menaça del ministèri public.

Un ambient de fèsta, de democracia e de jòia se respirava ièr per tot lo Principat de  Catalonha e per la Val d’Aran. Lo vòte per l’independéncia es estat multitudinari, e mai s’èra illegalizat per l’estat espanhòl, e mai se se fasiá jos la menaça del ministèri public.
 
La participacion es estada impressionanta. Mai de dos milions de personas, aperaquí lo 42% dels elegeires, an votat en un procès participatiu que lo govèrn espanhòl a declarat illegal e que lo Tribunal Constitucional a suspendut. La participacion en Aran tanben es estada de 1743 vòtes, çò que fa una participacion de 26%.
 
 
Lo resultat
 
Lo resultat es net e clar: un 80% dels catalans an votat per que Catalonha venga un estat independent; un 10% an causit l’opcion federalista, que Catalonha venga un estat mas pas independent; e un 4,5% an votat contra l’independéncia e per demorar parièr dins Espanha. Rèsta encara de comptar los vòtes a l’estrange, que son estats fòrça nombroses. A respècte d’Aran, un 62,60% dels araneses son partisans de l’independéncia, un 14,40% son mai per l’opcion federalista, del temps qu’un 12,85% son contra l’estat independent.
 
 
D’ensages d’empedir l’eveniment
 
Los partits politics espanholistas UPYD e Ciutadans amb qualques collectius espanholistas an ensajat d’empedir lo vòte en fasent lor denóncia als tribunals mas los jutges d’instruccion an refusat de retirar las urnas e de far barrar los burèus de vòte. De son costat, lo ministèri public a demandat a la polícia d’identificar los responsables de la dobertura dels burèus de vòte, mas sul pic, lo president de Catalonha, Artur Mas, a dich publicament que n’es el lo responsable.
 
 
Madrid vòl pas escotar
 
Mentretant lo govèrn espanhòl a dich que las donadas son pas bonas perque la jornada de vòte es pas “legala” e perque i a pas cap de “mecanisme de contraròtle”. Al delà, lo govèrn espanhòl de Mariano Rajoy a avertit lo president catalan Artur Mas en disent que son “actitud benefícia pas a las relacions dins l’avenir”.
 
La presidenta del Partit Popular de Catalonha (espanholista) a dich que la jornada es una “farsa” e l’eleccion un “trucatge electoral”. Lo partit Ciutadans(espanholista) a quitament comparat l’eveniment amb lo nazisme e lo franquisme.
 
 
Gràcias als volontaris
 
Pr’amor que la primièra convocacion foguèt illegalizada sul pic de Madrid estant, aquesta segonda convocacion s’es organizada gràcias als 40 930 volontaris, dont 54 en Aran. E mai se l’eveniment èra tanben enebit, èra juridicament mai complicat de l’empedir.
 
 
De centenats de mèdias de tot lo Mond
 
Aperaquí 600 jornalistas de 200 mèdias de tot lo Mond s’èran inscriches divendres per seguir oficialament la jornada. I son las grandas agéncias coma l’AFP, Reuters o Bloomberg. Lo govèrn de la Generalitat a abilitat per eles un centre de premsa dobèrt dempuèi divendres e que barrarà uèi, aqueste ser.
 
En general, los mèdias internacionals an soslinhat lo valor politica de l’eveniment e mòstran lor incompreneson a prepaus de la posicion del govèrn espanhòl.
 
 
D’observaires internacionals
 
Una comission d’observacion electorala formada de sèt politicians europèus analisèron ièr lo foncionament del vòte dins divèrses burèus e n’an fach un rapòrt. Demest aqueles observaires i es Gérard Onesta, vicepresident de la region occitana de Miègjorn-Pirenèus.
 
Lo president d’aquela comission es curiosament lo deputat conservator e unionista escocés Ian Duncan, qu’expliquèt sus son blòg qu’èra content de participar a aqueste procès: “abans d’èsser unionista, abans d’èsser un conservator, soi un democrata e cresi que lo drech de vòte es un dels mai fondamentals e mai presats qu’avèm”, çò diguèt.
 
 
Practicament sens incident
 
Practicament i a pas agut d’incident, levat dins los qualques cases seguents. A un burèu de vòte que li an sabotat la sarralha mas a pogut dobrir totun. Un atac faissista a agut luòc dins un local de Girona, mas los cinc paucvals responsables de l’agression son estats detenguts sul pic. E i a agut un pauc de paur dins un local de Cardedeu, que dins una envolopa de vòte i an trobat un messatge espanholista amb de posca blanca, mas après son analisi s’es averada inofensiva.