Edi Rama afirma que l’independéncia de Kosova es “una realitat indenegabla” que “deu èsser respectada”. Lo cap sèrbe respond que mençonar lo tèma es una provocacion. Lo governant albanés demanda un acòrdi d’autonomia pels albaneses de la val de Presheva.

La primièra vesita d’un primièr ministre albanés en Serbia, en 68 ans, foguèt marcada per un afrontament entre los dos caps de govèrn a prepaus de l’estatut de Kosova. Lo primièr ministre albanés, Edi Rama, diguèt diluns passat, davant lo sieu omològ sèrbe Aleksandar Vučić, que l’independéncia de Kosova es “una realitat indenegabla” e que “deu èsser respectada”. Rama apondèt que la secession kosovara a ajudat a estabilizar los Balcans.
 
L’intervencion de Rama agradèt pas brica a Vučić, que li respondèt en dirècte, en li disent que la referéncia a Kosova èra estada una provocacion. Rama, çò diguèt Vučić, aviá mancat lo protocòl en mençonar un tèma qu’èra pas previst, e apondèt que, quand vesitariá Tirana, i defendriá tanben que Kosova es sèrbe.
 
En de declaracions posterioras sus B92, Rama neguèt aver defendut lo projècte de la Grand Albania. Lo primièr ministre albanés reïterèt qu’el remarquèt solament “la realitat” de l’independéncia de Kosova e assegurèt que lo sieu govèrn respècta l’integritat territoriala de Serbia. Sens Kosova, evidentament.
 
 
L’autonomia pels albaneses de Presheva
 
La situacion dels albaneses de Presheva —una val de majoritat albanesa al sud de Serbia— foguèt l’autre afar controvertit que mençonèt Rama diluns a Belgrad. Lo primièr ministre albanés diguèt qu’aquela comunautat es favorabla al procès d’integracion de Serbia a l’Union Europèa e que merita que Belgrad li prèste atencion. Concretament, çò diguèt Rama, lo “modèl” que caldriá seguir a Presheva es “lo de las minoritats sèrbas en Kosova”.
 
Rama fasiá referéncia a l’acòrdi que Belgrad e Prishtina signèron en 2013 per la creacion d’una comunautat autonòma de las municipalitats sèrbas dins Kosova. Aquela comunautat aurà divèrsas competéncias e a l’ora d’ara es a preparar lo sieu estatut. Lo coordenaire de la còla que prepara aquela comunautat autonòma, Ljubomir Marić, ditz que lo modèl que se perseguís es similar al de Sud-Tiròl, una província autonòma de la Republica Italiana.
 
 
 


Aquesta nòva es adaptada del jornal catalan Nationalia, amb qui Jornalet a un acòrdi de cooperacion.