La seccion argentina d’Interpòl a mandat a la seccion espanhòla l’òrdre de detencion de dètz e nòu responsablas de la repression franquista. Se tracta de politicians, de policièrs, de jutges militars e d’un mètge. Sembla pas brica probable que la polícia espanhòla los detenga, mas l’òrdre obliga de los arrestar tre que sortiràn de l’estat espanhòl. Son acusats dempuèi lo 30 d’octòbre passat per la jutgessa argentina María Servini de Cubría, per de crimes comeses pendent aquela dictatura.
 
L’Associacion per la Recuperacion de la Memòria Istorica, primièra entitat que faguèt sa denóncia contra los crimes del franquisme davant la justícia argentina, a qualificat aquela nòva d’avançada “transcendentala” per aqueles que “dempuèi d’ans luchan contra l’impunitat de la dictatura franquista”.
 
Demest las personas recercadas per la justícia argentina, cal destacar Rodolfo Martín Villa, òme important del govèrn de Franco e deputat del Partit Popular fins en 2002. I cal remarcar tanben José Utrera Molina, lo que signèt la senténcia de mòrt de Salvador Puig i Antich. Utrera Molina es lo sògre de l’èx-ministre espanhòl de la justícia, Alberto Ruiz Gallardón, que ven de quitar son pòst en setembre passat, vencut après aver mancat sa proposicion de lei contra l’avortament.