Après dètz ans de viatge, lo robòt Philae s’es destacat de la sonda Rosetta, de l’Agéncia Espaciala Europèa (ÈSA), e s’es pausat sus la cometa 67P/Churiumov-Gerasimenko. L’operacion es estada una reüssida e l’an seguida en dirècte per tot lo Mond. Philae es ja sus la cometa. Investigarà ara la superfícia amb d’instruments scientifics.
 
S’agís d’una operacion reüssida e inedita menada per l’Agéncia Espaciala Europèa, que per lo primièr còp un engenh creat per l’òme s’es plaçat sul nuclèu d’una cometa. Lo robòt Philae èra empegat a la sonda Rosetta pendent los dètz ans qu’a durat lo sieu trajècte fins a se sarrar de l’orbita de la cometa “Churi”, coma l’an nomenada los scientifics. Lo robòt s’es daissat anar en casuda liura après se destacar de Rosetta e a desplegat sas patas per s’estacar a la superfícia de l’astre. Lo trajècte a durat aperaquí sèt oras, a una velocitat de 18 centimètres per segonda.
 
L’operacion a plan capitat e mai se los propulsors qu’a lo robòt Philae per l’ajudar a s’estacar a la cometa marchan pas plan, coma aviá ja avertit l’Agéncia Espaciala Europèa ièr de matin. Los scientifics an decidit d’avançar l’operacion perque lo robòt aviá d’autres sistèmas d’estacament qu’an garentit que se fixèsse corrèctament.
 
La foncion de Philae, qu’a aterrat dins la zòna coneguda coma Agilkia, serà de prene d’imatges de la superfícia de la cometa, que Rosetta recebrà e mandarà a la Tèrra, per los far estudiar. Tanben mesurarà e analisarà los materials organics que forman l’astre, que serián liats amb l’origina del Sistèma Solar.
 
Se tot va segon çò previst, la mission de Rosetta s’acabarà a la fin de 2015 o al començament de 2016. Fins a aquela data, l’engenh seguirà lo camin de la cometa cap al Solelh.
 
Las cometas son entre los astres mai ancians del nòstre Sistèma Solar e los scientifics espèran de poder obténer d’informacions fòrça importantas a prepaus de la formacion de las planetas e tanben de la vida sus la Tèrra. 



Tweets by @Philae2014