Los jutges d’instruccion en carga de l’enquèsta sus la mòrt de Rémi Fraisse an ara un element de mai qu’embarrassa las autoritats. Le Monde ven de publicar las convèrsas extrachas d’un procès verbal que mòstra las convèrsas entre los gendarmas al moment de la mòrt de Rémi Fraisse. Segon aquelas convèrsas, vegèron tombar Fraisse après li lançar una granada lacrimogèna, vegèron que se levèt pas e remarquèron sul pic qu’èra mòrt.

Lo procès verbal que publica Le Monde es la transcripcion, facha per de militars de la seccion de recèrcas de Tolosa, de las convèrsas enregistradas suls filmes que se fan a l’unitat dels gendarmas mobils dins aquel tipe d’operacions.
 
Après lançar la granada, entre 1h40 e 1h50 del matin del 26 d’octòbre, los agents remarquèron que lo jove tombèt al sòl. Alavetz un dels gendarmas ordenèt de cessar d’emplegar de granadas lacrimogènas. Aquí un autre policièr diguèt: “Va plan, se tornarà levar! Se tornarà levar, va plan!”
 
Mas a 2 oras, en vesent que Rémi Fraisse se tornava pas levar, los policièrs s’aprochèron. Lo còrs de Fraisse èra isolat. “Respira o qué?” çò demandèt lo superior del temps que l’infirmièr fasiá los gèstes de primièr secors. A 2h03, los gendarmas constatèron qu’èra vertadièrament mòrt: “Es mòrt lo tipe... aquò es plan grèu... cal pas qu’o sàpian”.
 
Lo servici de comunicacion de la gendarmariá a dich a Le Monde que los policièrs diguèron aquò per evitar que los autres manifestants venguèsson mai violents, e soslinha que las fòrças de l’òrdre foguèron fàcia a d’intensas violéncias a Sivens.
 
Fraisse foguèt tuat dins l’encastre de la repression d’una protèsta populara que comencèt d’un biais plan pacific contra la construccion d’una restanca dins la zòna umida del Testet, a Sivens (Galhaqués).






Rémi Fraisse : ce que les gendarmes ont vu la...per lemondefr