L’esportiu còrs Jean-Louis Leca, que jòga al fotbòl amb l’esquipa de Bastia (Corsega), es estat suspendut per doas partidas per la Liga de Fotbòl Professional (LFP) per aver mostrat la bandièra de son país, segon çò que publica lo sit de la ràdio còrsa Alta Frequenza. Dijòus passat, la comission de disciplina de l’LFP examinèt lo dorsièr concernissent los individús subrevenguts après lo rescontre de Liga 1 entre l’OGC Niça e l’SC Bastia lo 18 d’octòbre passat, que de suportaires e de jogaires niçards agrediguèron los jogaires còrses, après l’exibicion d’un drapèl de Corsega que los poders publics avián enebit.
 
La comission decidiguèt de barrar l’estadi niçard per doas partidas, qu’una es estada ja purgada fa qualques jorns, e de far jogar una autra partida a pòrta barrada. Tanben a condemnat lo jogaire còrs d’èsser suspendut per doas partidas, per una pretenduda “provocacion”. Se passèt qu’en aquela partida, Leca mostrèt una bandièra còrsa davant los suportaires niçards mai radicals, çò que provoquèt sul pic que los suportaires sautèsson sul terren per agredir los jogaires còrses, que se batián a l’encòp amb los jogaires niçards.
 
Mas l’origina d’aquel trist incident la cal anar quèrre a la prefectura del departament dels Alps Maritims, que dimècres enebiguèt l’intrada de totes los suportaires de Bastia, e mai “lo pòrt, la detencion e l’utilizacion de tot objècte e vestit a l’efígia de Còrsega o d’un club esportiu còrs”.
 
De fach, l’enebicion del drapèl còrs a Niça provoquèt l’indignacion de l’illa e lo club de fotbòl de Bastia pausèt un recors administratiu, e en seguida d’aquò, lo tribunal condemnèt l’estat francés a 500 èuros de multa, mas lo prefècte mantenguèt l’enebicion de la bandièra còrsa.
 
Rue 89 Sport ne publiquèt una analisi, ne responsabilizava los poders publics e quitament senhala lo cònsol de Niça, Christian Estrosi, que fa de populisme en profechant de l’eveniment violent.