Dimenge 16 de novembre, moriguèt a Barcelona lo grand lingüista catalan Antoni Maria (sovent Antoni M.) Badia i Margarit. Aviá 94 ans.

Nascut en 1920, Badia i Margarit foguèt una eminenta figura de la lingüistica catalana de la segonda mitat del sègle XX, en particular coma gramatician. En 1951, publiquèt en espanhòl una Gramática histórica catalana que sa version en catalan se faguèt sonque trenta ans apuèi. Encara en castelhan foguèt la Gramática catalana de 1962, a la quala succediguèt, en 1994, una Gramàtica de la llengua catalana, aqueste còp redigida dins sa lenga mairala.
 
Foguèt mai d’un còp doctor honoris causa de divèrsas universitats, entre las qualas, en Occitània, l’universitat de Tolosa. Ocupèt fòrça foncions prestigiosas, entretant la presidéncia de la Société de linguistique romane (“Societat de Lingüistica Romanica”), de la seccion filologica de l’Institut d’Estudis Catalans o de l’Associació Internacional de Llengua i Cultura Catalanes (“Associacion Internacionala de Lenga e Cultura Catalanas”), e recebèt en 2003 lo Prèmi d’Onor de las Letras Catalanas.
 
De biais paradoxal mas explicable per la repression franquista contra lo catalan, foguèt mai que mai professor universitari de castelhan, ja que tenguèt, de 1948 enlà, la cadièra de gramatica istorica de la lenga espanhòla de l’Universitat de Barcelona, que ne foguèt lo rector de 1978 a 1986, abans de se consagrar oficialament al catalan de 1987 enlà amb una cadièra correspondenta. Faguèt doncas d’autras causidas professionalas que l’autre grand lingüista catalan de l’epòca, lo lexicològ e lexicograf Joan Coromines (1905-1997, tanben especialista de l’occitan —en particular aranés, al qual consagrèt per exemple sa tèsi doctorala—, que per conviccions catalanistas e antifranquistas s’estimèt mai l’exili e una carrièra a l’estrange, en particular a l’Universitat de Chicago). Los dos lingüistas entretenián saique de relacions complicadas, segon un article de Vilaweb publicat en 2000.
 
Las funeralhas d’Antoni M. Badia i Margarit se faràn diluns 17 de novembre a las tres del jorn dins la glèisa del Pin de Barcelona. 




_____
Domergue Sumien: Omenatge a Antoni Badia i Margarit