Dos canòts pneumatics de l’armada espanhòla ataquèron dissabte passat los canòts de Greenpeace que se sarravan del vaissèl Rowan Renaissance davant las Illas Canàrias per protestar contra las prospeccions petrolièras dins aquela zòna. Lo vaissèl arribèt divendres al luòc que li aviá indicat lo Ministèri del Foment per i far las polemicas prospeccions, que la majoritat del partits canaris son contra. En seguida de l’intervencion de l’armada espanhòla, una activista de l’ONG, una jove italiana, foguèt ferida: li trenquèron una camba e la deguèron menar a l’espital de la Grand Canària. Ara ja se pòrta plan.
 
Segon la version del Ministèri espanhòl de la Defensa, la jove tombèt tota sola dins l’aiga quand los ecologistas ensajavan d’abordar lo vaissèl e l’armada o impediguèt, e foguèt ferida amb l’eliç de son canòt. L’armada se seriá sarrada solament per la salvar.
 
Per contra, la version de Greenpeace explica que sos canòts an pas d’elices, e que los canòts de l’armada se lancèron violentament sus eles quand protestavan pacificament.
 
Dins aqueste vidèo, enregistrat e editat per Greenpeace, se pòt veire los atacs dels canòts de l’armada espanhòla e la casuda de l’activista dins la mar:




Greenpeace a dich tanben que contunhan l’accion de protèsta davant lo vaissèl de Repsol que trabalha en las prospeccions, fòra la zòna d’exclusion qu’an decretat las autoritats.