Una dimenjada tretzista amb son sacat d’emocions e de partidas qualitosas: la victòria de la Nòva Zelanda dins lo Torneg de las 4 Nacions, un rescontre al cotèl entre Tolosa e Carcassona... Provèrbi del jorn: “En novembre, la finta de passa embruma...”

Shaun Johnson, lo rei de Wellington
 
Los Kiwis avián ganhada la competicion internacionala del Torneg de las 4 Nacions en 2010: servarián lor trofèu o l’esquipa rejovenida d’Austràlia se revoltariá aprèp lo 30-12 de la primièra partida? Dissabte, davant los 25 000 espectators ramosats, los Negres dominèron los Verd e Jaune e, levat lo primièr ensag signat pels Cangorós (Jennings, en recepcion d’una candela, a la 10a), faguèron la corsa en cap. Lo mesclanha Shaun Johnson, ja dins la legenda tretzista amb son ensag de la darrièra segonda de la mièja finala del Mondial a Wembley contra Anglatèrra, menèt lo jòc amb mestritge e biais: una longa passa li permetèt d’escartar Vatuvei (34a) per confirmar l’avantatge a la pausa: 14-6; una serpentejada lo menèt darrèr la rega (57a) e un escafament de quatre Cangorós li permetèt de dobrir d’una novèla passa longanha lo camin de l’ensag per Vatuvei tornar (61a). Se sas transformacions tustèron dos còps lo pal, ensaquèt las doas autras e ajustèt una penalitat. Los australians contestèron la supremacia negra fins a la còrna: l’ensag de Ben Hunt, transformat per Cameron Smith, a cinc minutas del tèrme, los entornèt a 4 punts: 22-18. Un enabans anullèt la darrièra accion dels Cangorós. E los locals pleguèron pas... Pel primièr còp dempuèi... 1953, Austràlia pèrd dos còps en seguida —un vertadièr... Trafalgar!— fàcia a sos vesins.
 
Rendètz-vos es pres per un novèl torneg de las 4 Nacions per 2016 en Anglatèrra. E per una novèla gorbejada refofanta de jòc e de plaser... amb lo malcòr que siaguen d’autres Blaus, aqueles dels cardons d’Escòcia, que prenguen part a la fèsta.
 
 
E de nòu per Carcassona!
 
La pelena dels Minims èra grassa per reçaupre jol solelh benvolent de la tardor lo rescontre entre lo campion, Tolosa, e lo cap de fila, Carcassona, aqueste dissabte de vèspre. Gressèque dobriguèt la marca amb una penalitat (10a). Las atacas dels uns e dels autres se truquèron a unas defensas ermeticas coma d’ustras de Bosiga. Mas a la 35a, Kriouache trapèt lo trauc dins los barris de Ciutat, trapèt a nautor Keirralah que mandèt Hulme a l’ensag. Tre lo remandadís, meteis sicut erat levat qu’es Hulme que mandèt Keirralah a l’ensag e coma lo mesclanha transformava los dos còps, los Tolzans tornèron al vestirari amb un avantatge significatiu de 12-2. A la represa, Carcassona mostrèt qu’èra pas venguda faire de torisme e lo neozelandés Samson i anèt de son ensag setmanièr (48a). Los audencs profeitèron d’una superioritat numerica per passar dos còps: per l’arrièr Towers (53a) e pel centre Guiraud (57a). Amb las transformacions de Gressèque, los Canaris menavan 20-12 a l’ora de jòc. Lo dobertura de Carcassona manquèt una penalitat fàcia als pals e Tolosa volguèt pas pèrdre sus son èrba: trapèt las solucions en escartant la pauma e Maurèl (62a), puèi Minga (74a) permetèron als locals de tornar prene l’avantage: 22-20. Es alara que Maxim Gressèque trapèt una engana al fons de sa saca magica: dos cambiaments de pè, una finta de passa, un pichon còp de pè a ras de pelena per el meteis, ensag al pè dels pals e transformacion per confirmar la seguida de l’invicibilitat carcassonesa: 26-22! De partidas atal, ne volèm cada dimenjada!
 
Dimenge, al Molin, es sus un ritme mendre que se debanèt lo dèrbi entre Lesinhan e Limós. La partida demorèt indecisa fins a la còrna mas los locals arrestèron l’espirala de las desfaitas (5 de seguida!): 24-22.
 
E gardan l’espèr de se qualificar per la pola bèla d’aitan mai que los Dragonets an perdut 12-8 a Vilanuèva; Avinhon, amb cinc penalitats d’Arnaud, signa sa primièra victòria de la sason a Palau: 19-8.
 
Pel compte de la desena jornada, dissabte, Carcassona reçauprà Palau puèi dimenge Tolosa serà a Limós e Vilanuèva a Avinhon. A Sant Estève, la partida Dragonets-Lesinhan serà importanta en vista de la qualificacion per la pola bèla.
 
La dintrada pels Dracs
 
Los Dracs tornan prene l’entraïnament: Remi Casty es tornarmai dins l’efectiu catalan aprèp l’annada passada cò dels Roosters. Los internacionals australians Todd Carney e Willie Tonga son tanben arribats per preparar la sason novèla, mentre que l’australian Michael Monaghan…, qu’arrèsta sa carrièra de jogaire a Warrington, segondarà l’entraïnaire Laurenç Fraissinós en companhiá de Jiròni Guisset.
 
Los Dracs jogaràn una partida amicala lo dissabte 24 de genièr a Carcassona contra una seleccion audenca de jogaires de Carcassona, Lesinhan e Limós, batejada “País Catar”!
 
 
 
 
Alan Roch