Lo cònsol de Sibiu venç per suspresa lo socialdemocrata Victor Ponta al segond torn de las presidencialas en fasent valer son imatge de bon gestionari. Iohannis pertanh a la comunautat alemanda de Transilvània. Lo nòu president defend la descentralizacion, mas refusa de crear d’autonomias “etnicas”.

Romania a causit un nòu president: Klaus Iohannis, cònsol de Sibiu, luterian en un país de majoritat ortodòxa e membre de la comunautat alemanda de Transilvània. Iohannis (55 ans), del Partit Nacional Liberal, a vencut al segond torn per suspresa lo candidat favorit, lo primièr ministre Victor Ponta (Union Socialdemocrata), per 9 ponches de diferéncia. Iohannis remplaçarà a la carga Traian Băsescu, president dempuèi 2004.
 
Iohannis es lo cònsol de Sibiu, tanben conegut per son nom alemand d’Hermannstadt. E s’atròba qu’aquela ciutat es estada lo centre istoric de la comunautat alemanda transilvana, dicha “saxona”, presenta dins lo territòri dempuèi lo sègle XII, quand lo rei Géza II d’Ongria comencèt de los installar ailà per que li defendèsson la frontièra meridionala de son reialme. La monarquia ongresa lor autregèt l’autonomia administrativa e religiosa, e long dels sègles seguents van ocupar de posicions de privilègi en Transilvània.
 
La populacion saxona baissèt durant l’epòca de Ceaușescu, e encara fòrça mai après la fin del regim comunista, quand una partida significativa de la comunautat emigrèt cap a Alemanha —entre ela, los parents del quite Iohannis—.
 
De fach, actualament a Sibiu nonmàs l’1% de la populacion pertanh a la minoritat alemanda. Aquò empachèt pas qu’Iohannis ganhèsse las eleccions municipalas en l’an 2000, e que foguèsse reelegit en 2004, 2008 e 2012. Sempre amb d’avantatges espectacloses: a pas jamai baissat de dos tèrces dels vòtes, e en 2012 n’obtenguèt lo 78%.
 

Lo “trabalh ben fach” per bandièra
 
Iohannis a fach una campanha centrada sus una idèa fòrça: el es lo candidat del “trabalh ben fach” —es estat lo sieu eslogan electoral—, e lo prètzfach complit dins son Sibiu natal o confirma. Iohannis obtenguèt per Sibiu la capitalitat europèa de la cultura en 2007, renovèt e recuperèt lo centre istoric, impulsèt l’economia de la vila, subretot gràcias al boom toristic.
 
Lo president elegit, ça que la, s’es ocupat pro de soslinhar son ligam incondicional amb lo país: “Qu’impòrta se soi un alemand etnic? Soi romanés. Aicí es la mieuna tèrra, la mieuna pàtria”, çò declarava durant la campanha electorala.
 
Iohannis ditz qu’en Romania, ara, conven d’avançar cap a una descentralizacion e regionalizacion pus aprigondida. Lo novèl president considèra qu’aquò es una aisina per lo melhorament del país en partent de las administracions pus pròchas dels ciutadans —i bota coma exemple son prètzfach a la comuna de Sibiu—. En aquel procès, Iohannis compta de transferir de competéncias e de finançament als govèrns regionals e locals, mas lo programa ditz pas res d’autrejar d’autonomia legislativa als territòris dels pòbles minorizats, contra çò que demandan los partits ongreses de Transilvània. De fach, durant la campanha, Iohannis se mostrèt opausat a “regionalizar amb de critèris etnics”, perque aquò “resolveriá pas cap de problèma e ne creariá d’autres”.
 

Escarta pas la reünificacion amb Moldàvia
 
Los arguments etnics valon pas per “regionalizar”, mas per contra si que son valids per impulsar la “relacion especiala” amb Moldàvia, país amb lo qual Romania manten una “comunautat de lenga, istòria, civilizacion e cultura”, çò ditz lo programa electoral d’Iohannis. Lo nòu president romanés remarca que degun pòt pas forçar Moldàvia a se reünificar amb Romania, mas recòrda que tanpauc degun o poiriá pas empachar se los moldaus o volguèsson. Dementre, l’engatjament de Bucarèst, çò explica lo programa d’Iohannis, es d’impulsar l’intrada de Moldàvia dins l’Union Europèa e de contunhar d’autrejar de passapòrts romaneses a totes los moldaus qu’o desiren.




_____
Aquesta nòva es adaptada del jornal catalan Nationalia amb qui Jornalet a un acòrdi de collaboracion.