L’estat espanhòl a respondut al vòte simbolic sus l’independéncia: portaràn en justícia lo president Artur Mas, la vicepresidenta e la conselhièra d’educacion per usurpacion de foncions, malversament, desobesisença e prevaricacion.

Lo president de Catalonha, Artur Mas, la vicepresidenta, Joana Ortega, e la conselhièra de l’educacion, Irene Rigau, seràn portats en justícia per aver organizat lo procès participatiu ont los ciutadans votèron sus l’independéncia del país, segon çò qu’anoncièt ièr dimècres lo ministèri public espanhòl. Las acusacions son d’usurpacion de foncions, malversacion, desobesissença e prevaricacion.
 
Lo govèrn espanhòl declarèt illegal lo referendum convocat pel president catalan e demandèt al Tribunal Constitucional de lo suspendre. Alavetz lo president de Catalonha suspendèt lo referendum e convoquèt un procès participatiu organizat per de volontaris e sens cap de recensament electoral prèvi, mas amb de garentidas democraticas. Lo Tribunal Constitucional suspendèt tornarmai lo procès participatiu, a la demanda del govèrn espanhòl, mas lo vòte se debanèt ça que la. I participèron lo 42% dels elegeires de Catalonha e Aran. Lo resultat es estat net e clar: l’80% an votat per que Catalonha venga un estat independent.
 
 
Los procuraires catalans “contaminats”
 
Lo ministèri public de Catalonha mostrèt sos dobtes a prepaus d’aquelas acusacions, quand lo vicesecretari del Partit Popular declarèt que los procuraires catalans son “contaminats” pel catalanisme. Fin finala lo procuraire general de l’estat a impausat sa decision e las mesas en acusacion se debanaràn aquesta setmana. 



 

fffff		fffff
	Denóncia contra TV3 per una badinada   En mai d’aquò, lo Partit Popular a fach sa denóncia al Conselh de l’Audiovisual de Catalonha per una badinada del programa d’umor Polònia. Aquela badinada recreava la scèna coneguda del bunquèr dins lo filme Der Untergang (La Casuda), i vesèm lo president espanhòl que se planh del succès del vòte independentista en Catalonha.   Lo director del programa, Toni Soler, a declarat que se son assegurats “que dins lo tèxt i aguèsse pas cap de frasa que poguèsse restacar Rajoy amb l’ideologia nazi, e visualament i aviá pas cap d’element que se poguèsse restacar amb lo Tresen Reich”. “Se tracta de la parodia d’un filme qu’aquela scèna es fòrça parodiada”, çò apondèt Soler.