Per lo primièr còp la polícia italiana a capitat a enregistrar la ceremònia d’intrada e de  jurament de fidelitat a la Santa, lo gra mai naut d’apertenéncia a la màfia calabresa, nomenada ’Ndrangheta. Fasiá mai d’un sègle que se coneissiá aqueles rituals d’iniciacion, mas totjorn per de vias indirèctas coma de confessions de pentits e de documentacion sasida. Ara, gràcias a un enregistrament del Grop d’Operacions Especialas (ROS) de la polícia, avèm un document grafic amb tota la ceremònia, ont los caps mafioses recomandan als iniciats de se suicidar se fan “una error grèva”.
 
Los vidèos s’enregistrèron dins una proprietat de Castello di Brianza, una comuna près de Milan (Lombardia), en una operacion judiciària e policièra de mai de dos ans qu’a permés d’arrestar quaranta membres de la ’Ndrangheta, a l’ora d’ara l’organizacion mafiosa mai poderosa d’Itàlia, qu’es quitament davant la Cosa Nostra siciliana e la Camorra napolitana.