Après una setmana d’espèra e de tensions, la Comission Electorala d’Egipte anoncièt ièr que lo candidat dels Fraires Musulmans, Muhammad Mursi (o Mohamed Morsi), a ganhat las presidencialas. De milièrs d’activistas e de simpatizants del partit islamista qu’ocupavan plaça Tahrir, simbòl de la revolucion que tirèt del poder fa un an e mièg lo dictator Husni Mubarak, an mostrat la lor jòia amb la proclamacion de Mursi, qu’a vencut l’èx-general Ahmad Shafiq.

Segon lo recompte de la comission electorala, Mursi recebèt 13,2 milions de vòtes al segond torn de dimenge passat, del temps que l’èx-ministre de Mubarak, Shafiq, n’amassèt 12,3 milions. La participacion foguèt de 51%.
 
La tardança en la proclamacion dels resultats, qu’èra prevista per dijòus passat, aviá menat qualques milièrs de simpatizants dels Fraires Musulmans, e tanben de partidaris de la revolucion, a ocupar la plaça Tahrir del Caire per exigir l’anonci dels resultats e la derogacion de l’emendament constitucional de l’armada, que modifica la declaracion constitucionala del 30 de març de 2011. Aquel emendament de l’armada, qu’a lo poder presidencial dempuèi la demission de Mubarak, autreja a la polícia militara e als servicis secrets las competéncia per arrestar de civils. Los manifestants exigisson tanben l’anullacion de la dissolucion del parlament, decretada pel Tribunal Suprèm fa una setmana, e la convocacion d’un referendum per que la populacion se pòsca exprimir sus aquela question.
 
 
L’armada, en alèrta
 
Las Fòrças Armadas egipcianas se tròban en estat d’alèrta dempuèi ièr de matin, pr’amor de la publicacion del resultat del segond torn de las eleccions presidencialas. La preséncia de l’armada se pòt veire per carrièras, amb de veïculs cuirassats davant las sedenças de las principalas institucions publicas.
 
Mas la principala temor èra una eventuala victòria de Shafiq, per la protèsta qu’aviá pogut ocasionar entre los manifestants e, mai que mai, pel retorn al poder d’una persona totalament restacada al regim de Mubarak.