Cinc mes arron la fin de la prumèra sason de Good Morning Occitània, dus mèdias qui an participat ad aquera annada de descobèrta d’un programa inedit en lenga nosta qu’an recomençat ua navèra sason. Que vienen de lançar un crowdfunding suu site Ulule. Arron quauques mes d’espèra e de tensions, la sason 2 de la matiada Good Morning Occitània qu’ei plan lançada a Ràdio Occitània. Ràdio Occitània qu’ei ua ràdio associativa locau que vadó 30 ans a dens la Vila Ròsa.
 
Lo concèpte qu’ei lo medish mes dab ua esquipa diferenta. D’efèit, despuish un mes, que compta au demiei de la soa esquipa un navèth emplegat, un jornalista, lo capredactor de La Setmana, Clamenç Pech. La mutualizacion qu’ei l’objectiu principau d’aqueste partenariat enter los nostes dus mèdias occitans. Dens l’amira de perennizar l’emission de Good Morning Occitània, Vistedit/La Setmana en aliança dab Ràdio Occitània que lançan aquera operacion de crowdfunding.
 
La mutualizacion qu’ei l’objectiu principau d’aqueste partenariat enter los dus mèdias occitans. Si mercés aus donadors, atenhen la soma minimau tà que’s realize lo projècte, que vòlen perpausar, dab la moneda amassada, un navèth supòrt d’actualitat en lenga nosta. La ràdio que perpausa ja ua emission animada per Guilhèm Gratiolet de tres òras cada matin de 7h enlà dinc a 10h. Las divèrsas cronicas, las entervistas politicas, los flashs d’informacion deu Clamenç Pech e la musica que ritman aqueste programa matinau.
 
Que perpausa un bon balanç enter la descontraccion de Guilhèm e lo seriós deu capredactor de La Setmana, Clamenç Pech. Las informacions qu’i son ua prioritat. Lo jornau que dura 5 minutas cada mieja òra jos forma de notícias bracas e de minireportatges sus subjèctes d’actualitat. Atau, la vita de las collectivitats, las infrastructuras, mes tanben lo desvolopament sostenable, las navèras tecnologias e plan segur l’actualitat culturau d’Occitània que son tractats cada matin dens Good Morning Occitània.
 
 
3850 èuros tà la concretizacion
 
Totun, Ràdio Occitània e La Setmana que cèrcan benevòls entà enriquir la matinala. L’esquipa de Good Morning Occitània qu’espèra las vòstas cronicas de tres a cinc minutas dab impaciéncia. Plan segur, que poderatz beneficiar d’ua ajuda materiau, tecnica e redaccionau entà que lo vòste tribalh e sia plan miat. Que poderatz parlar d’istòria, de cinèma o enqüèra d’espòrt en lenga nosta. Los benevòls qu’an ua libertat sancèra pertocant la regularitat de la vòsta cronica.
 
Que pòt estar ua cronica cada dia, cada setmana o cada mes. Vistedit/La Setmana e Ràdio Occitània que puntan deu dit l’importància de las ressorsas umanas suu lor perhiu Ulule. Los 3850 èuros minimaus demandats que representan lo 9,2% de la soma investida (la massa salariau representant un còst annau de 41 620 èuros). Aquesta soma que permeterà de pagar lo jornalista pendent près de 4 mes, “lo temps per [vos] provar que lo nòstre programa serà qualitós e viable”.
 
 
 
 
CP
 
 
 
____
Inf.: fr.ulule.com/goodmorning-occitania/