Setmana Mistral a Narbona
 
A Narbona, la primièra setmana serà consagrada al sovenir de Frederic Mistral, a l’iniciativa del cercle occitan local. Las mòstras, conferéncias e animacions se tendràn a l’Ostal Occitan (jos l’Ofici de Torisme) ont serà presentada la mòstra “Mistral e Euròpa” . Cada jorn, a 18h, se tendràn d’intervencions, de conferéncias e d’animacions: talhièr de cants “Cantar Provença”, lo diluns 1r; una conferéncia de Joan Claudi Forêt, “Mistral, son òbra, sas posicions politicas”, lo dimars 2; una charradissa d’Alan Roch. “A la taula del Frederic” e una Fèsta de l’Alhòli, lo dimècres 3; un talhièr-cosina de l’Ànnia basat sus las tradicions de Nadal e los tretze dessèrts, lo dijòus 4; una lectura de tèxtes “Mistral e Narbona”, lo divendres 5.
 
 
Temps de Nadal a Carcassona
 
A Carcassona, l’Ostal Sirventés (79 la Trivala, a Carcassona) presentarà una mòstra del fotograf catalan David Oliete consagrada a las piramidas umanas catalanas, brave simbòl de solidaritat: els castellers (estrena: dijòus 4, 18h30). Seguiràn d’autres rendètz-vos (cada còp a 18h30): conferéncia sus las musicas e los cants de Lauragués (divendres 5); rescontre amb l’umorista Clamenç (divendres 12); tastavins (Domeni Santa-Maria d’Albàs) e chocolats (diluns 15), Paraulas de Nadal (dimècres 17), Lo Rei de las Agraulas presentat per Sèrgi Carles (dijòus 18) e presentacion del libre Carcassonne, la Cité dans l’Histoire (divendres 19).
 
 
Cants e musicas de Lauragués
 
Aprèp la conferéncia de dobertura del divendres 5 a l’Ostal Sirventés amb Xavièr Vidal e Renat Jurièr, Canti-Canta prepausa pel dissabte 6 e lo dimenge 7 de decembre la causida entre cinc talhièrs pertocant Lauragués e son repertòri tradicional a Carcassona e Castèlnòu d’Arri: danças, cants, musica, bodega, practica d’ensemble (programa detalhat, precisions e inscripcions: canticanta@h...).
 
 
Pan e dessèrts 
 
L’associacion Slow Food-L’Aude à la bouche celebrarà lo Terra Madre Day (Jorn de la Tèrra-Maire), lo dissabte 13 a Cucunhan, per una jornada consagrada al pan, en particular amb l’intervencion del molinièr-fornièr qu’a reviscolat lo molin local. En fin de vèspre, Mirèlha Braç animarà una charradissa-tasta sus la tradicion dels 13 dessèrts nadalencs.
 
 
Passejada de nuèit
 
L’associacion L’Abribus de Montlaur met en plaça sa passejada nadalenca nocturna e conviviala per la serada del dimenge 21.
 
 
Nadal al cafè de Marcelin Albèrt a Argelièrs
 
Per sa part, la jove associacion Cafè Marcelin Albèrt celebrarà Nadal amb la dobertura excepcionala del cafè istoric d’Argelièrs (Aude), lo diluns 22 en fin de vèspre (a comptar de 17h) amb una programacion bèla: cafè, vin caud, chocolat caud, fogassas… servits en vestits del temps; conferéncia sul mond obrièr agricòla just abans 1907; donacion oficiala de tiratges fotografics originals del fons Henri Bouscarles-Sallis; presentacion de Mémoires de Marcelin Albert per Cristian Salès; aperitiu tradicional de Nadal amb de vin d’irange, de quinquina, de Kina Karo, de macabèu; cants de Nadal lengadocians; conte de Nadal per Alan Roch; castanhas grasilhadas, sopa de cebas, sopa de coja, sopa de castanhas, sopa de legums de sason; presentacion e tasta dels 13 dessèrts de Nadal; espectacle participatiu... 
 
 
E tanben
 
E encara, vos parlam pas dels mercats de las trufas negras (represa lo dissabte 13 de decembre a Mossolens), de las fièras del gras (grand rendètz-vos a Bèlpuèg, lo 13 e lo 14 )…
 
 
 
 
IEO Aude