Lo govèrn israelian ven d’aprovar un decret que definís Israèl coma un “estat josieu”. Lo Parlament del país lo deurà aprovar o refusar dimècres que ven. Aquel projècte de lei modifica la constitucion del país per proclamar lo caractèr exclusivament josieu de l’estat. Se fins ara la constitucion definissiá Israèl coma “estat josieu e democratic”, ara serà “l’estat nacional del pòble josieu”, en i despareissent lo mot “democratic”.

“Dins l’estat d’Israèl i a una egalitat individuala per totes los pòbles, mas lo drech nacional es reservat solament al pòble josieu”, çò diguèt Netanyahu en tot defendre aquela lei, que tanben prevei que l’ebrieu venga la sola lenga oficiala e l’arabi quite aquel estatut.
 
Aquel projècte de lei, prepausat per 4 deputats ultranacionalistas, s’aprovèt ièr amb 15 vòtes en favor e 7 contra dins una session accidentada, ont lo quite primièr ministre, Benjamin Netanyahu, s’afrontèt dins de crits amb divèrses ministres. Dels quatre partits del govèrn de coalicion, tres sostenon la modificacion (Likud, Israel Beitenu e lo Fogal Josieu) mas lo partit centrista Yesh Atid es contra.
 
Aquela lei pòt causar un gran malèsser als ciutadans israelians arabis, que son lo 20% de la populacion. E mai se los que defendon la lei afirman qu’ara cal “protegir lo judaïsme”, segon fòrça analistas aquò es “empurar lo gavèl”.
 
 
“L’inscripcion del racisme dins la lei”
 
Aquela proposicion de lei arriba dins un contèxt de montada de las tensions a Jerusalèm Èst, la partida palestiniana ocupada, lo jorn que de colons israelians an cremat amb de benzina un ostal a Ramallah, e après los incidents violents qu’an seguit l’atemptat ont òm tuèt cinc israelians dins una sinagòga de Jerusalèm Oèst.
 
Aquel 20% de populacion nomenats arabis-israelians, son los sols palestinians que poguèron restar sus lor tèrra après la creacion de l’estat d’Israèl en 1948. Segon d’informacions de Le Point, acusan lo projècte de lei d’institucionalizar la discriminacion. Afirman d’èsser tractats coma “ciutadans de segonda zòna” après que las autoritats an pres la quasi‑totalitat de las tèrras de las comunas aràbias per i installar de colons josieus, e denóncian una “inscripcion del racisme, ja present per carrièras, dins la lei al còr del sistèma politic”, segon çò qu’a declarat Majd Kayal del centre juridic Adalah de defensa dels dreches de la minoritat aràbia.
 
De son costat, lo procuraire general del govèrn israelian, Yehoda Weinstein, a tanben criticat lo projècte, en estimant qu’afeblís lo caractèr democratic d’Israèl.
 
Per contra Netanyahu es segur de l’aspècte democratic de la lei qu’a presentat. “I a los que vòlon que la democracia prevalga sul caractèr josieu e i a los que vòlon que lo caractèr josieu prevalga sus la democracia. Dins los principis de la lei que vos presenti uèi, aqueles dos principis son egals”, çò diguèt.