Lo Papa Francés, dins sa vesita al Parlament Europèu, demandèt a l’Union Europèa d’ofrir “ajuda e aculhida” als migrants clandestins, en un moment de crisi umanitària a Calais. “Se pòt pas tolerar que la Mar Mediterranèa venga un grand cementèri! Dins las barcas qu’arriban cada jorn sus las còstas europèas i a d’òmes e de femnas qu’an besonh d’ajuda e d’aculhida”, çò diguèt. Lo pontife a sollicitat aquela Euròpa “velhida e reducha” per que “redescobrisca son arma bona” e que “vire pas a l’entorn de l’economia”.
 
Bergoglio volguèt mandar un messatge de coratge als europèus en afirmant que l’impression generala es de “fatiga e d’envielhiment”. Dins aquel sens, lo pontife remembrèt que lo mot “dignitat” es estat clau per la recuperacion del continent après la Segonda Guèrra Mondiala.
 
Lo viatge que faguèt lo Papa ièr al Parlament Europèu es lo mai cort qu’a fach, solament de 4 oras e sens cap d’acte religiós. Pasmens, un grop de deputats d’esquèrra quitèron la cambra per protestar. “Sèm pas aicí per de sermons religioses”, çò diguèt la pòrtavotz del grop de l’Esquèrra Plurala, Marina Albiol.
 
Martin Schulz, president de l’Eurocambra, recebèt lo Papa davant la pòrta del Parlament, e escotèron los imnes del Vatican e de l’Union Europèa. Davant la bastissa i aviá d’ecrans gigants per seguir la vesita. Es lo segond còp qu’un pontife vesita l’institucion europèa. Lo primièr foguèt Joan-Pau II en 1988.
 
Lo Papa vesitarà Turquia de divendres a dimenge que ven.
 
 
 
_____
Discors del Papa en anglés, francés e italian. (PDF)