Es ja mesa en marcha la novena edicion dels prèmis Llanterna Digital de cortmetratges en catalan e occitan. Los participants ne pòdon trobar las basas sul sit web del concors.
 
La jurada serà presidida pel critic de cinèma catalan Àlex Gorina. Se constituirà de representants dels organismes e entitats que participan a l’organizacion, e mai de professionals de la lenga e del sector audiovisual. Las òbras ganhantas, las finalistas e las seleccionadas per la jurada en occitan (parlat o sostitolat) faràn partida de la programacion de l’8a Mòstra de Cinèma Occitan, que se poirà veire en diferentas localitats catalanas e occitanas, a partir de junh de 2015. 
 
Aqueles prèmis vòlon contribuir a la promocion de l’usatge del catalan e de l’occitan a travèrs de cortmetratges que prepausen una reflexion sus las lengas. S’adreiçan a totes los membres de las doas comunautats lingüisticas dins lo Mond entièr.
 
Organizan l’eveniment la Generalitat de Catalonha, l’Universitat de Lhèida, l’Escòla Oficiala de Lengas de Lhèida e lo sindicat Comissions Obrièras. Dins l’edicion de 2015 collabòran lo Conselh General d’Aran, l’Institut d’Estudis Ilerdencs, la Comuna de Lhèida e una cordelada d’entrepresas d’aquela ciutat catalana.