A Fois an capitat, fin finala, de plantar un fraisse en onor de Rémi Fraisse. N’avián ja plantat un fa doas setmanas mas la comuna lo retirèt l’endeman.

Dissabte passat a Fois un seissantenat de personas faguèron un omenatge a Rémi Fraisse, e plantèron un fraisse dins lo Pargue de Boissièra segon çò que rapòrta La Setmana. N’avián ja plantat un fa doas setmanas mas la comuna l’aviá retirat l’endeman. Ara l’arbre es respectat après de negociacions amb la comuna.
 
Los participants a la ceremònia critiquèron l’actitid del cònsol que participèt pas a l’acte e que permetèt pas que se paussèsse una pancarta sus l’arbre.
 
La Setmana soslinha l’emplec de la lenga occitana pels militants que menèron aquela accion. De tractes dels collectius opausats al projècte de Sivens se conclusián a còps amb aqueles mots “Sèm pas de motonalha”, en occitan dins lo tèxt.
 
 
De problèmas pel govèrn francés
 
De fach, la mòrt de Rémi Fraisse a portat la crisi al govèrn francés. Las nombrosas susmautas que se son ocasionadas per tot l’estat francés en seguida de la mòrt de l’estudiant de botanica an portat de problèmas al govèrn de la Republica.
 
Lo govèrn francés a ensajat de reglar la mòrt del jove tolosan en enebissent l’usatge de las granadas e en suspendent los trabalhs del barratge, mas un larg sector de la societat, los movements ecologistas e los partits d’esquèrra demandan la demission del ministre de l’interior, Bernard Cazeneuve, que se limitèt a dire que i auriá “de sancions se se son comesas de fautas”. Mentretant, las protèstas e las susmautas se multiplican e los estudiants en cauma protèstan tanben en seguida la mòrt del jove activista.