Las femnas que luchan amb las milícias curdas son al centre d’atencion dels mèdias mentre que l’Estat Islamic (EI) a avançat cap a Mossol, una de las grandas vilas d’Iraq, e fins al territòri autonòm curd de Kobanê. Aital o remembra un article de Vilaweb en collaboracion amb Global Voices.
 
Las agéncias de nòvas internacionalas e fòrça activistas an soslinhat, dins lors informacions e suls rets socials, los imatges de las femnas peshmèrgas. L’idèa e l’imatge de femnas amb l’unifòrme, fòrtament armadas, sens paur e en tot combatre sembla qu’es un dels messatges mai fòrts de provocacion contra l’Estat Islamic, l’organizacion integrista que fa de masèls massisses, tant de soldats coma de civils, cooperants e jornalistas, e rauba de femnas que son forçadas a se maridar e se sometre. De fach, a Mossol las femnas son embarradas a l’ostal e pòdon pas marchar per carrièras.
 
Cada jorn se parteja d’imatges de femnas combatentas. Mas al delà de l’aument de l’atencion mediatica, cal dire que dins totes los conflictes, las femnas curdas son estadas activas.
 
Cal soslinhar lo cas de Margaret George Shello, una de las primièras femnas fotografiadas que luchèt en las montanhas amb los peshmèrgas e que venguèt un simbòl de la participacion femenina dins la lucha curda durant los ans 1960.
 
Lo combat dels curds en Turquia, amb l’aparicion de grops armats coma lo PKK dins los ans 1970, tanben es estat menat per d’òmes e de femnas, tanben al comandament.
 
Es a dire, que las femnas combatentas en Curdistan son pas un fenomèn actual, e mai se los grands mèdias o avián pas soslinhat quand parlavan de la lucha per l’autonomia o l’independéncia de Curdistan.