Solament dos meses après la desbranda independentista dins lo referendum d’Escòcia, los sondatges indican qu’ara l’“òc” ganhariá, pr’amor de la decepcion de las promessas unionistas de mai d’autogovèrn e descentralizacion. Dins aqueste clima d’esperança sobeiranista es nascut The National, lo primièr jornal escocés clarament independentista.
 
The National se publicarà cinc jorns per setmana e costarà mièja liura esterlina (aperaquí 0,63 èuro). Los legeires devon normalament èsser lo milion sièis cents mila personas que votèron per l’independéncia fa dos meses, e se fixa la tòca d’arribar a totes los qu’esitèron a l’ora de votar. La còla de The Nacional afirman que l’independentisme serà lèu lo 60% o quitament lo 70% de la populacion escocesa.
 
Lo jornal es proprietat del meteis grop que Herald e The Times. L’editor del grop, Richard Walker, n’anoncièt l’aparicion a dotze mila personas del Partit Nacional Escocés, que dissabte anèron escotar la nòva primièra ministra escocesa Nicola Sturgeon.
 
L’editor del jornal, Tim Blott, a dich que “The National es una granda escasença per satisfar los besonhs d’un sector politicament fòrça engatjat de la populacion escocesa. Reconeissèm que lo lançament d’un jornal en 2014 es pas una idèa intelligenta, mas cresèm al poder del bon jornalisme de l’opinion informada”.