Lo parlament escocés deu aver lo contraròtle de l’impòst sul revengut, segon la comission de totes los partits britanics creada après lo referendum d’independéncia per negociar un nòu autogovèrn. Los partits an presentat aqueste dijòus passat lor proposicion, que recomanda tanben de transferir una partida de las intradas de la TVA, tot l’impòst de l’Air Passenger Duty que s’encaissa pels viatges en avion, e de permetre a Edimborg lo vòte als joves de 16 e 17 ans a las eleccions localas e escocesas. “Avèm mantengut la nòstra promessa al pòble escocés”, çò diguèt lo primièr ministre britanic, David Cameron. Pel president de la “Comission Smith”, la proposicion es lo “pus grand transferiment de poders dempuèi l’establiment del Parlament”.

Los tres caps britanics, lo conservator David Cameron, lo laborista Ed Miliband e lo liberaldemocrata Nick Clegg, s’èran engatjats qualques jorns abans lo referendum escocés a negociar un transferiment larg de poders al parlament escocés d’Holyrood se lo 18 de setembre los ciutadans votavan de “non”. Amb la victòria unionista pel 55% dels vòtes, se decidiguèt d’establir la Comission Smith, una comission transversala amb de representants de totes los partits, tanben los independentistas de l’SNP, per negociar de proposicions d’autogovèrn.
 
Lo rapòrt publicat aqueste dijòus presenta coma poder mai considerable lo transferiment total de l’impòst sul revengut, una revendicacion clara dels nacionalistas qu’aviá recebut fins ara l’oposicion frontala dels laboristas, qu’an cedit fin finala. Lo tèxt recomanda tanben que lo Parlament escocés pòsca autorizar de votar als joves de 16 e 17 ans a las eleccions, après lor vast engatjament al referendum, ont poguèren votar per lo primièr còp. Los partits prepausan tanben de transferir l’impòst que se paga per volar dempuèi los aeropòrts, lo contraròtle del 10% de las intradas de la TVA e d’engrandir los poders en benestança sociala que pertòcan los vièlhs e los andicapats.
 
Lo primièr ministre britanic, David Cameron, a dich qu’es “encantat” amb aqueles plans, qu’ara ne cal redigir un primièr esbòs legislatiu per transferir aqueles poders e que tot seriá alestit a la fin de genièr.
 
De son costat, lo govèrn escocés diguèt qu’es una bona nòva, e mai se pel nòu viceprimièr ministre escocés, John Swinney, la proposicion es pas pro ambiciosa: “segon aquelas proposicions, mens del 30% dels nòstres impòstes se marcaràn en Escòcia e mens del 20% de la despensa en benestança sociala serà transferida”, çò diguèt en un comunicat.