Lo partit galés considèra que se pòt pas far de distincions entre nacions constituentas del Reialme Unit. Galas ten son camin pròpri d’aumentacion d’autogovèrn, mas lo Plaid Cymru lo vei “despassat pels eveniments d’Escòcia”. Cornoalha, Yorkshire e las grandas vilas auçan la votz per obténer lor pròpria “devolucion”.

Lo principal partit nacional galés, lo Plaid Cymru, a demandat que totas las competéncias que Londres transferirà a Escòcia tanben sián autrejadas a Galas. O a dich Jonathan Edwards, diputat del Plaid Cymru al Parlament britanic, après que lo 27 de novembre, la Comission Smith —formada per de representants dels cinc partits amb representacion al Parlament escocés— anoncièsse un acòrdi per aumentar l’autonomia d’Escòcia.
 
“Galas es tant una nacion coma Escòcia”, çò a dich Edwards, “e los poders que se metràn a disposicion d’Escòcia tanben los caldriá metre a disposicion de Galas”. Entre aquelas competéncias, segon çò que s’anoncièt lo 27 de novembre, i a l’impòst sus lo revengut e una partida de l’IVA (o TVA): son de poders liats amb l’estat del benestar e l’autonomia per organizar las eleccions escocesas e municipalas.
 
Dempuèi 2012, Galas es a organizar son pròpri procès d’aumentacion d’autogovèrn. Una comission similara a l’escocesa —la Comission Silk— prepausèt, en dos rapòrts de novembre de 2012 e de març de 2014, que Londres transferiguèsse a Galas de poders nòus en matèria fiscala, judiciària e policièra. Entre las competéncias fiscalas que se poirián transferir a Galas, tanben i a l’impòst sus lo revengut, mas dependrà d’un referendum que lo govèrn galés deu convocar.
 
 
Un lei “despassada pels eveniments d’Escòcia”
 
Ça que la lo Plaid Cymru considèra qu’aquel paquet de mesuras de la Comission Silk s’es trobat “despassat pels eveniments d’Escòcia”. E ara, lo partit galés se demanda se los partits britanics poiràn argumentar que çò bon per Escòcia o es pas per Galas.
 
Galas es pas lo sol territòri on s’auçan de voses per una “devolucion” pus aprigondida. En Cornoalha, lo partit Mebyon Kernow demanda d’aprofechar la redefinicion de l’estat britanic per crear una assemblada autonòma cornica. E divèrsas voses —coma la del primièr cònsol de Londres, Boris Johnson— exigisson mai d’autonomia per las grandas vilas anglesas, en i inclusent Manchester, Liverpool e la capitala. Al nòrd d’Anglatèrra, certans partits reclaman la creacion d’una assemblada regionala per Yorkshire.
 
 
 


______
Aqueste article es adaptat de la revista en linha Nationalia, amb qui Jornalet a un acòrdi de cooperacion.