Alan Eustace, un òme d’afars e un dels vicepresidents de Google, sautèt en setembre en paracasuda dempuèi l’estratosfèra a 41 150 mètres d’altitud. Amb aquel saut superèt lo recòrd mondial que l’aviá atengut l’austrian Felix Baumgartner dos ans abans. Un recòrd, o cal dire, qu’a conservat, e mai se “Superman” a ensajat de lo li prene. Perque qualques jorns puèi, la societat de joguets Mattel encarguèt Design Spark d’enviar una figurina del supereròi al delà de l’atmosfèra e de la far tornar sus Tèrra amb un saut estratosferic.
 
La còla de Design Spark obtenguèt que lo Superman sautaire montèsse fins a 29 000 mètres, e d’ailà lo faguèt sautar cap a la Tèrra en paracasuda. Tota l’ascension e la casuda (que de còps arribèt als 200 quilomètres ora) s’enregistrèt en vidèo e se contrarotlèt amb GPS, d’altimètres e de transmissors de ràdio.
 
La còla de Design Spark explican tot lo procès dins lor blòg e an publicat tanben los detalhs de l’experiéncia sul portal Instructables per que qui vòlga o pòsca reproduire.