Actualitats
Tres meses de Jornalet: tres meses a bastir l’espaci mediatic occitan
Bilanç de tres meses de "Jornalet"
Tres meses son passats dempuèi que Jornalet nasquèt amb la tòca de metre la siá pèira al bastiment de l’espaci mediatic nacional. Fisèls al nòstre engatjament original, lo jornal a ensajat d’ofrir de nòvas presentadas segon un vejaire occitan e a donat la paraula a totes los opinants qu’i vòlon exprimir la lor opinion per rapòrt a la cultura, la lenga, la politica, l’economia o quin autre aspècte que siá de la vida occitana. Es ara un bon moment per agachar enrèire e far bilanç.
En chifras redondas, lo jornal a agut en tres meses a l’entorn de 50 000 vesitas, es estat vesitat per 15 000 usatgièrs unencs e lo nombre de paginas vistas supèra las 125 000 al total. La durada mejana de la vesita aumenta regularament e despassa ja las quatre minutas e mièja, e cada vesita obrís aperaquí tres paginas en mejana. La donada que, pasmens, nos fa mai contents es qu’un tèrç de las vesitas contunha d’èsser, uèi, de mond que i intran per lo primièr còp, aquel fach demòstra que Jornalet contunha d’agrandir l’espaci mediatic occitan amb de legeires nòus cada jorn.
Al nivèl territorial, la nòstra gaseta occitana d’informacions a recebut de vesitas de 78 païses, en essent qualques unes talament alonhats de la realitat d’Occitània coma Qatar, Colómbia, Japon o la Nòva Zelanda. Mas totun, la granda majoritat de las vesitas venon dels diferents territòris occitans e dels quatre Estats ont s’espandís la nòstra nacion: França, Itàlia, Espanha e Mónegue. Dins aquel sens, mai de 95% de las vesitas venon d’aqueles quatre estats. Se remarca, a prepaus, los Estats Units, amb de vesitas venent de 25 dels lors Estats, en tot èsser al quatren luòc del reng de las vesitas.
Al delà de las chifras e de las estatisticas, sèm mai que mai satisfaches pel vivièr d’opinants que se son fisats del nòstre mèdia per difusar las lors opinions e vejaires. En fach, las opinions son las informacions mai legidas, çò que confirma que lo pòble occitan aviá enveja d’opinions donadas dempuèi l’encastre del país. Sèm tanben fòrça contents pel sosten qu’avèm recebut dels grands lingüistas e filològs del país, que nos an permés de resòlver fòrça dobtes lingüistics e de començar a bastir un lengatge jornalistic modèrne e accessible a totes, que respècta a l’encòp las nòrmas de la lenga.
Per tot aquò, cresèm umilament que Jornalet a ja una plaça dins las abituds mediaticas de fòrça occitans e sèm conscients de la nòstra responsabilitat. Esperam èsser a l’auçada de las espèras e contunhar en servissent Occitània.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
La granda victòria del jornalet es l'ensemble de las opinions, mas soi segur encara que se podriá far melhor... perqué los opinions dels locutors e de las locutriças d'Occitània fáutan en professions diferenciadas, fauta en femnas !
Benlèu que se podriá melhorar en organizar debat en audiovisual, e difusar sobre aquesta pagina aprèp. Los locutors e las locutriças occitans son mai que tot elonhat de l'escrich, vist que l'escrich es pron elonhat de las escòlas en Occitània.
«la nacion non volèm», perqué serián a,arquista... es justament lo problèma. Qu'es aquò una nacion ? Se la nacion es aquela d'Ernest Renan e Maurice Barrès, es aquela de la nacion ciutadana (semantica recentament emplegada al Parti Socialiste), ne cal vóler per Occitània ? Seriá una nacion sonque una descripcion antropologica coma s'exprimava abans los dos terroristas franceses ?
Devèm mesclar l'antropologia (la nacion) e lo juridic (la ciutadanetat, los vòts de las leis parlamentàrias) ?
E se deseparèm los dos, comprenèm melhor que l'Estat francés es diferent de totes los Estats d'Euròpa ; la dicha revolucion francesa aurà portat lo pòble al poder a París, a París, perqué mantunas autras revolucions èran estadas la marca en Occitània pron abans París (Jacme Servat las revolucions en Occitània). Avèm portat la revolucion a París e quitament los anarquistas se son faits enganar per la semantica parisenca, estonant non ?
Referéncia Cornelius Castoriadis «de la cité et des lois», édicion Le Seuil, 1994.
#5
Pas cap de diccionari, lingüista o organisme de la lenga aconselha la fòrma "acò".
L'ortogràfia es pas sonque una question d'etimologia, mas tanben d'usatge emai se l'usatge , de còps, va en contra l'etimologia.
A la "Acò-Academy", (quantes de sòcis?), avètz la libertat de decernir los acò-awards a totes los estrambordats per aquel subjècte que vos voldràn seguir
#5 Qu'escrivem "aquò" per analogia dab "aqueth", punt.
Qu'es aquesta grafia barròca "aquò" ? Sens fondament etimologic per mor que ven del latin eccu+hoc.
Se que non perque escrivèm aiçò e non pas *aissò ?
Avètz lo poder de socializar "acò", qu'es talament pus bèl e regde d'escriure
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari