Lo mes de decembre es arribat amb un polit present per las comunautats lingüisticas e culturalas bretona, basca e galèga. Après qualques ans de negociacions e de cambadas, lo procès d’activacion dels domenis generics pròpris —.bzh, .eus e .gal— Es arribat al darrièr estadi: lo de la dobertura al public.
 
Uèi s’es dobèrt al public lo sufixe identificador de la lenga e la cultura bretonas, lo .bzh. Lo domeni, autorizat per l’ICANN en mai de 2013, es arribat gràcias a una campanha en favor d’un domeni breton que comencèt en 2004 amb una fòrta participacion de la societat civila bretona e que comptava amb lo sosten del conselh regional de Bretanha e de divèrses conselhs generals del país.
 
Segon l’associacion qu’a impulsat la demanda —e qu’a amassat mai de 21 000 sostens— pòdon ja demandar lo domeni las personas residissent en Bretanha e tanben aqueles que, dempuèi la rèsta del Mond, se consagraràn a promòure la lenga e la cultura del país.
 
Ièr dimècres, foguèt lo Jorn Internacional de la Lenga Basca, e se dobriguèt al public lo domeni .eus, que dempuèi julhet l’emplegavan d’entrepresas e d’institucions pionièras. La Fondacion PuntoEus crei que se’n reservarà dos mila dins aquela primièra fasa de lançament.
 
Dimars foguèt lo cas del sufixe galèc, que ja lo pòdon crompar los qu’auràn de sits restacats a la lenga e la cultura de Galícia. L’associacion que lo gerís, PuntoGal, a previst que se registrarà aperaquí mila sits .gal dins la fasa de lançament, e que pendent la primièra annada s’arribarà fins a cinc mila.
 
Totes aqueles identificadors d’Internet an recebut l’assessorament del domeni .cat, lo primièr d’aquelas caracteristicas, que comencèt per la lenga e cultura catalanas en 2006.