Lo 3 de decembre es mòrt Jaume Barròt [Jacques Barrot], aquel celèbre politician occitan qu’a jogat un ròtle important en Velai, dins l’estat francés e dins l’Union Europèa. Son decès es subrevengut dins lo mètro de París.

Nascut en 1937 a Sinjau (Velai), Barròt obtenguèt una licéncia de drech. Comencèt la politica en eiretant de la circonscripcion electorala de son paire, en Velai. De 1966 a 2004 foguèt conselhièr general del departament del Naut Léger (comprenent Velai e Brivadés). De 1976 a 2004 foguèt president del Naut Léger. De 1967 a 2004 foguèt deputat del Naut Léger a l’Assemblada Estatala francesa.
 
Entre 1978 e 1997 lo nomenèron ministre mai d’un còp dins diferents govèrns franceses de drecha. Aguèt un ròtle important dins los partits franceses de centredrecha, en particular al Centre dels Democratas Socials (CDS), qu’èra una partida de l’èx-UDF (ancessora del Modèm). Barròt èra conegut per reconciliar las tendéncias rivalas dins sa familha politica.
 
Foguèt vicepresident de la Comission Europèa de 2004 a 2009. Tanben i tenguèt las cargas de comissari europèu de la politica regionala (en 2004), dels transpòrts (de 2004 a 2008) e de la justícia (en 2008 e 2009).
 
Dempuèi 2010 èra membre del Conselh Constitucional de l’estat francés. Aquel òme originari d’Occitània s’illustrèt pas per defendre energicament l’occitan ni l’ensemble de la lengas minorizadas (coma o indica aquesta decision del Conselh Constitucional que i participèt).
 
 
 
DS