Era Val d’Aran e era rèsta deth país que seràn fin finau comunicades per transpòrt public. Eth Govèrn d’Aran qu’a començat de trabalhar damb es autoritats deth canton de Sant Biat e dera sosprefectura de Sant Gaudenç entà méter en marcha un autobús que connecte aqueri parçans aumens un còp per setmana. Ath delà de perméter as aranesi de viatjar entara rèsta deth país, Aran se poderie dar a conéisher “coma territòri de qualitat e de referéncia de nhèu e de montanha”, çò diguèc Valdecantos, que higèc que “damb aguesta linha regulara tanben se profeitarie dera connexion damb er aeropòrt de Tolosa”.
 
Aguesta decision ei frut d’ua amassada de trabalh entre eth conselhèr deth territòri d’Aran, Eduardo Valdecantos, eth sosprefècte de Sant Gaudenç, Jean-Luc Brouillou, e eth president dera comunautat de comunes deth canton de Sant Biat, Jöel Gros, entà trebalhar amassa en projèctes transfrontalièrs.
 
En aquera amassada se parlèc tanben deth projècte europèu RisqHydro, eth hilat transfrontalièr de deteccion de risqui idrologics, dirigit pera deputacion de Lheida. Ath delà, eth circuit de bicicleta d’aperaquí 120 quilomètres que percor eth Pirenèu occitan, que jonherà era Val d’Aran en tot profeitar deth Camin Reiau.
 
 
 
 
FM