Luènh de cercar de responsabilitats e de demandar perdon per la mòrt de Rémi Fraisse, abatut a Sivens lo 25 d’octòbre passat a causa d’una granada lançada per la polícia, las autoritats de l’estat francés ensajan tornarmai de criminalizar lo movement que sosteniá la victima. Lo rapòrt de l’IGGN cèrca de demostrar la violéncia dels zadistas en citant una television d’ultradrecha.

L’enquèsta administrativa publicada dimars passat, en mai de conclure que las fòrças de l’òrdre cometèron pas nada “fauta professionala”, ensaja d’illustrar la violéncia dels zadistas en citant una entrevista acordada a una cadena de television d’ultradrecha.
 
A lançat l’alarma una fiulada sus Tweeter de Pierre Januel, un collaborador d’Euròpa Ecologia-Los Verds (EELV), qu’a remarcat aquela mençon sus la pagina 6 del rapòrt de l’Inspeccion Generala de la Gendarmariá Estatala (IGGN segon sa sigla en francés).
 
Amb l’objectiu de l’administracion d’illustrar las dificultats qu’avián los jornalistas a trabalhar serenament sus la ZAD (zòna a defendre) del Testet, a Sivens, lo rapòrt mençona lo jornalista ultranacionalista francés Pierre-Alexandre Bouclay qu’ensaja sus la cadena de television TV Libertés de deslegitimar e criminalizar lo movement dels opausants a la restanca de Sivens.
 
De fach, aquel reportatge mençonat coma seriós pel rapòrt de l’IGGN foguèt ja denonciat pel sit antifaissista d’actualitats La Horde lo 17 de novembre passat.
 
 

#Sivens En page 6 du rapport IGGN, TV libertés, Tv de la fachosphère est citée comme source sérieuse http://t.co/oGWqP6uMDJ

— Pierre Januel (@PJanuel) December 2, 2014