Uruguai a aculhit coma refugiats sièis presonièrs de Guantánamo, après la principala liberacion de detenguts dins lo sit dempuèi 2009. La setmana passada, lo president estatsunidenc Barack Obama diguèt que voliá barrar aquel polemic centre de detencion, çò qu’èra una promessa qu’aviá facha dins sa primièra campanha electorala. Los presonièrs son un tunisian, un palestinian e quatre sirians que son estats embarrats dins de gàbias pendent fòrça annadas e qu’ara son estats liberats sens cap de carga.
 
Après aquela liberacion, lo camp de detencion a encara 136 personas dont 73 son declaradas liuras de cargas dempuèi qualques meses e solament esperan que qualque país los aculhisca. La politica dels Estats Units es d’empedir que tornen dins lors païses d’origina e de los liberar vèrs un autre país que los vòlga aculhir coma refugiats. Pasmens la burocracia es fòrça lenta. Uruguai accediguèt arunan a aculhir qualques presonièrs e fins ara i son pas anats.
 
Lo president Obama, après la dura revirada electorala del mes passat, a iniciat una seguida d’accions per recuperar de sostens, en ensajant de reprene qualques mesuras qu’aviá anonciat quand arribèt al poder mas qu’aviá pas jamai complit; demest aquelas mesuras, i a l’amnestia per un nombre important d’immigrants illegals e lo barrament del sit de detencion de Guantánamo.