Lo conselh general de Tarn desbloquèt en abril 450 000 èuros per far regnar l’òrdre a Sivens, segon çò que publica lo jornal en linha L’Âge de Faire. Aquel meteis jornal planh que se destinèsse pas cap d’èuro al debat.  Dins aquel sens, L’Âge de Faire explica que la revendicacion principala dels opausants a la restanca de Sivens èra precisament un debat, e quitament qualques militants èran en cauma de la fam —un d’eles fins a 60 jorns— per revendicar aquele debat, mas Thierry Carcenac, president del conselh general del departament de Tarn, lo refusèt categoricament.
 
Per contra, segon lo contracte que se signèt amb la societat nomenada Compagnie d’Aménagement des Coteaux de Gascogne (CACG), que pòrta lo projècte de la restanca, se budgetèron 450 000 èuros per assegurar la seguretat del chantièr. Lo departament ne pagariá 225 000 e l’Agence de l’Eau los autres 225 000.
 
L’article de L’Âge de Faire denóncia tanben mantas irregularitats de l’òbra e planh que la reaccion a la mòrt de Rémi Fraisse siá de metre en marcha un debat public sus la violéncia dels zadistas.