Lo govèrn francés a gelat un projècte de centre d’expertesa e d’assais destinat a l’energia petroliera. Se deviá installar dins la Mar Mediterranèa, près d’Ieras, en Provença, en se pausant sus de fons marins. Aqueu centre, qu’a nom Abyssea, se seriá trobat au bèu mitan d’un santuari internacionau de proteccion dei cetacèus, apelat Pelagos.

Segon Le Figaro, lo gèu dau projècte foguèt anonciat dimars per Ségolène Royal, la ministra francesa de l’ecologia, dins una letra au prefècte dau departament de Var. Royal i disiá qu’encargava lo Conseu Generau de l’Environament e dau Desvolopament Sostenable “d’estudiar un autre luòc d’implantacion” e, en esperant sei conclusions, ordenava “de pas perseguir la procedura d’autorizacion”.
 
Lo centre petrolier Abyssea prevei de crear doas plataformas pausadas a 1 300 e 2 400 mètres de fons, au larg d’Ieras. Sa tòca es d’assajar leis esquipaments offshore de l’indústria petroliera e miniera, en condicons realas, especialament dins lei tecnologias sosmarinas per grandei prefondors. Abyssea costariá 13 milions d’èuros que lo 35% ne seriá finançat per de fons publics.
 
Lei movements ecologistas e lei representants d’Ieras s’opausan a aqueu projècte. Diluns, lo conseu municipau d’Ieras votèt còntra eu una mocion de desfisança en denonciant un “projècte opac”. D’elegits d’EELV dison que lo projècte “respònd pas ais exigéncias actualas de refonda dau modèl energetic ni a l’installacion necessària de la transicion ecologica”.
 
 
 
DS