En 2011, lo Principat de Mónegue s’associèt al programa “Abelha, sentinèla de l’environament” de l’Union Nacionala de l’Apicultura Francesa. Dins aquel encastre, s’implantèt de brescas dins mai de 60 vilas. Divendres 22 de junh se debanèt la tresena culhida de mèl, dins la sala del Canton, en preséncia d’escolans monegasques.

Marie-Pierre Gramaglia, Conselhièra de Govèrn per l’Esquipament, l’Environament e l’Urbanisme, soslinhèt l’importància d’aquelas jornadas de sensibilizacion sus una espècia particularament vulnerabla: “en 2011 un rapòrt del Progama de las Nacions Unidas per l’Environament (PNUE) sul ‘desòrdre dins las colònias d’abelhas e d’autras menaças suls pollinizators’ verifica que lo nombre de colònias d’abelhas es en fòrta reduccion dins de nombrosas regions del mond e detalha mai d’una dotzena de factors que ne poirián èsser responsables, demest eles, i a: la diminucion de las espècias de plantas de flors, los damatges dels insecticidas, la propagacion d’organismes prejudiciables, la contaminacion atmosferica.”
 
La Direccion de la Disposicion Urbana e l’apicultor Jacques Balavoine mostravan als escolans d’una classa de 6a del Collègi e de 7a de l’escòla de La Condamina lo procès de culhida de la mèl e de la mesa en pòt, abans de respondre un quizz. Tornèron totes a l’ostal amb un petit pòt de mèl facha a Mónegue.
 
S’es extrach 70 kg de mèl dins aquela primièra culhida annala.