La dròlla, Gabrièla, e lo dròlle, Jaume, son los enfants qu’esperavan lo prince Albèrt IId e sa molhèr Charlena. Jaume es l’eiretièr del tròn car la lei de succession dona la prioritat als dròlles. 

Dimècres, lo prince Albèrt IId de Mónegue e la princessa Charlena anoncièron, per comunicat oficial, la naissença de lors dos nenons, Gabrièla e Jaume, çò explican l’AFP amb Libération.
 
Los bessons e la maire se carrejan ben. La lei de succession vòl que lo dròlle, qu’a nom Jaume Onorat Rainièr, siá lo primièr eiretièr pr’amor qu’es de sèxe masculin. Sa sòrre, Gabrièla Terèsa Maria, es numèro dos e mai se nasquèt doas minutas abans son fraire.
 
Prenon de títols de fèus ancians de la familha Grimaldi: Jaume es marqués dels Bauç, en Provença, e Gabrièla es comtessa de Carladés, en Auvèrnhe.
 
La naissença, subrevenguda a l’Espital de la Princessa Gràcia, foguèt saludada per 42 còps de canon. Albèrt e Charlena modifiquèron l’usatge tradicional: en luòc de far restontir 101 còps de canon per un dròlle e 21 per una dròlla, consagrèron 21 còps a cada nenon, çò es 42 al total. Puèi las campanas de las glèisas sonèron pendent un quart d’ora, seguidas de las serenas dels vaissèls.
 
Se convida la populacion del principat a decorar los edificis amb lo drapèl monegasc fins que Charlena e Albèrt presenten los nenons dempuèi un balcon del Palais Princièr. Aquela presentacion serà jorn de fèsta. Se demanda de remplaçar los presents als dos enfants per de dons que seràn redistribuits a d’associacions que los donadors las causiràn.
 
Albèrt IId afortiguèt qu’abans la naissença, avián pas volgut saber lo sèxe dels enfants qu’anavan nàisser. “Sabètz”, çò diguèt, “òm a pas sovent l’ocasion d’aver de suspresas tant agradablas dins la vida. Emperò m’estimo mai de conóisser pas lo sèxe dels nenons abans la naissença”.
 
Abans son maridatge amb Charlena, Albèrt IId a ja agut dos enfants nascuts de relacions liuras, çò que los empacha d’eiretar del tròn monegasc: se tracta de sa filha Jazmin Grace Grimaldi, de 22 ans, que sa maire es una serviciala estatsunidenca, e de son filh Alexandre Coste, d’11 ans, que sa maire es una èx assistenta de vòl francesa e togolesa.