L’Union Europèa retirèt diluns passat de la telaranha la vidèo polemica de la campanha lançada la setmana passada per promòure l’investigacion entre las gojatas. Lo títol de la campanha es “Sciencie: it’s a girl thing!” (La sciéncia es un afar de gojatas), e dins la vidèo s’i pòt veire d’investigatrises atractivas, e mescla d’imatges de maquilhatge e de produches de beutat amb los d’un laboratòri. La granda quantitat de criticas forcèt la Comission de retirar lo filmet. Mas fòrça gents l’an tornat publicar sus YouTube.
 
La comission disiá, quand lancèt la campanha, que pretendiá demostrar a las gojatas que la sciéncia “es amusanta e ofrís de grandas oportunitats”.
 
Quitament se la vidèo es retirada, lo sit web de la campanha contunha d’èsser actiu e manten la meteissa estetica de la vidèo, talament criticada. E s’i pòt veire qualques vidèos mai, mas fòrça desparièrs, de la campanha: i apareisson divèrsas investigatrises explicant los lors cases e las lors experiéncias.
 

Meghan Gray respond a la vidèo sexista de l’UE: “Siatz vosautras meteissas!”

Pauc de temps après l’aparicion de la vidèo polemica de la campanha de l’UE per promòure l’investigacion entre las gojatas, se’n publiquèt una autra qu’a agut un notable succès dins lo ret e qu’es una reaccion a la primièra: l’astronòma anglesa Meghan Gray, de l’Universitat de Nottingham, critica los estereotipes sexistas de la vidèo que la Comission a agut de retirar e encoratja las joves e los joves europèus d’aver la passion, l’interès e l’enveja de descobrir amb la sciéncia.

“La vidèo es plena d’estereotipes qu’an pas res a veire amb lo fach que las gojatas s’interèssen a la sciéncia”, çò ditz Gray. “Restaca las gojatas amb la mòda, los talons nauts, lo maquilhatge…, que son d’interèsses entièrament valids per quina femna que siá, per quina gojata que siá, per quin òme que siá. Mas a un messatge fòrça fòrça marrit.” E apond: “Se vòles èsser realista en encoratjant los joves per la sciéncia, que sián d’òmes o de femnas, lor cal dire que sián apassionats e que ne vòlgan saber mai sul foncionament de l’univèrs. E aquela vidèo fa pas res d’aquò.”

“Nos agradariá plan que i aguèsse fòrça mai de femnas estudiant las sciéncias, e s’agís que n’i pòsca aver mai, non pas per anoncis frapants, mas pel lor interès personal e per la lor passion”, perseguís l’astrònoma. E ditz per clavar: “Lor nos cal dire: siatz vosautras meteissas, trobatz quicòm que vos interèsse e gaudissètz-ne!”